កម្ពុជាប្រកាសជំហររឹងមាំ ប្រឆាំងអំពើឈ្លានពានថៃ និងការបង្ខិតបង្ខំគ្រប់ទម្រង់

ភ្នំពេញ៖ កម្ពុជាបានប្រកាសជំហររឹងមាំថា នឹងមិនចុះចាញ់នឹងការបង្ខិតបង្ខំ ឬការបំភិតបំភ័យគ្រប់ទម្រង់ពីសំណាក់ថៃឡើយ នៅក្នុងសន្និសីទសារព័ត៌មានដ៏សំខាន់មួយនាពេលថ្មីៗនេះ។

លោកស្រីឧត្តមសេនីយ៍ឯក ម៉ាលី សុជាតា អនុរដ្ឋលេខាធិការ និងជាអ្នកនាំពាក្យក្រសួងការពារជាតិ បានធ្វើសេចក្តីថ្លែងការណ៍យ៉ាងច្បាស់លាស់នៅម៉ោង ៤រសៀលថ្ងៃទី១១ ខែធ្នូ ដោយបញ្ជាក់ថា៖ «យើងបញ្ជាក់ឡើងវិញនូវសិទ្ធិស្វ័យការពារដែនអធិបតេយ្យភាពរបស់យើង ស្របតាមច្បាប់អន្តរជាតិ ដើម្បីការពារបូរណភាពទឹកដី និងសុខសន្តិភាពប្រជាជន ទោះក្នុងតម្លៃណាក៏ដោយ។»

ការប្រកាសនេះមកក្នុងពេលកងកម្លាំងកម្ពុជាកំពុងប្រើសិទ្ធិការពារខ្លួនប្រយុទ្ធយ៉ាងស្វិតស្វាញ ប្រឆាំងនឹងការឈ្លានពានពីសំណាក់ថៃ។ អ្នកនាំពាក្យក្រសួងការពារជាតិបានបញ្ជាក់ថា កងកម្លាំងកម្ពុជាបានឈរជើងយ៉ាងរឹងមាំ ស្វាហាប់ និងមុះមុត ដើម្បីការពារបូរណភាពទឹកដីជាតិ។

កម្ពុជាបានប្រើសិទ្ធិស្របច្បាប់ ស្របតាមមាត្រា ៥១ នៃធម្មនុញ្ញអង្គការសហប្រជាជាតិ ក្នុងការការពារខ្លួន និងឆ្លើយតបយ៉ាងម៉ឺងម៉ាត់ចំពោះអំពើឈ្លានពានពីថៃ ដែលបានចាប់ផ្តើមការវាយប្រហារពេញលេញចាប់ពីថ្ងៃទី៧ ខែធ្នូ។

អ្នកនាំពាក្យក្រសួងការពារជាតិក៏បានអំពាវនាវឱ្យប្រជាពលរដ្ឋទាំងអស់បន្តជឿជាក់ និងលើកទឹកចិត្តដល់កងទ័ពការពារជាតិដ៏អង់អាចក្លាហាន ដែលកំពុងតស៊ូប្រយុទ្ធយ៉ាងខ្លាំងក្លានៅគ្រប់សមរភូមិ។

កងទ័ពថៃត្រូវបានចោទប្រកាន់ថា បានប្រព្រឹត្តអំពើរំលោភបំពានលើច្បាប់អន្តរជាតិជាច្រើន រួមមានការប្រើយន្តហោះចម្បាំង F-16 ទម្លាក់គ្រាប់បែកលើទីកន្លែងស៊ីវិល ការប្រើឧស្ម័នពុល និងការវាយប្រហារទីតាំងប្រវត្តិសាស្ត្រដូចជាប្រាសាទព្រះវិហារ និងប្រាសាទតាក្របី។

រាជរដ្ឋាភិបាល កងទ័ព និងប្រជាជនកម្ពុជាបានប្រកាសពីសាមគ្គីភាពរួបរួមគ្នាជាធ្លុងមួយ ក្នុងការការពារទឹកដី សេចក្តីថ្លៃថ្នូរ និងអធិបតេយ្យភាពជាតិដោយមិនងាករេ។

ដោយ៖ តារា