By ភ្នំពេញ៖ នារសៀលថ្ងៃទី១១ ខែធ្នូ ឆ្នាំ២០២៥ លោកស្រីបណ្ឌិត ពេជ ចន្ទមុន្នី ហ៊ុន ម៉ាណែត បានអញ្ជើញទៅសួរសុខទុក្ខយោធិន និងប្រជាពលរដ្ឋដែលកំពុងសម្រាកព្យាបាលជំងឺនៅតាមមន្ទីរពេទ្យផ្សេងៗក្នុងរាជធានីភ្នំពេញ។
ក្នុងឱកាសនេះ លោកស្រីបណ្ឌិតបាននាំយកពាក្យផ្តាំផ្ញើសួរសុខទុក្ខដោយក្តីបារម្ភយ៉ាងខ្ពង់ខ្ពស់ពីសម្ដេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ព្រមទាំងសម្ដេចមហាបវរធិបតី ហ៊ុន ម៉ាណែត។
លោកស្រីបាននាំយកអំណោយជាគ្រឿងបរិភោគ សម្ភារប្រើប្រាស់ និងថវិកាមួយចំនួនទៅជូនយោធិន និងប្រជាពលរដ្ឋដែលកំពុងសម្រាកព្យាបាលជំងឺ។ លោកស្រីបានលើកទឹកចិត្ត និងសូមជូនពរឱ្យពួកគាត់មានសុខភាពល្អមាំមួនវិញឆាប់ៗ។
“ថ្នាក់ដឹកនាំនៅតែគិតគូរ និងជំរុញដល់ក្រុមគ្រូពេទ្យបន្តមើលថែ រហូតដល់ជាសះស្បើយទាំងអស់គ្នា។ យើងមិនបោះបង់បងប្អូនវីរកងទ័ពរបស់យើងឡើយ” លោកស្រីបានអះអាង។
ការទស្សនកិច្ចនេះបង្ហាញពីក្តីព្រួយបារម្ភ និងការយកចិត្តទុកដាក់របស់ថ្នាក់ដឹកនាំចំពោះសុខភាព និងសុខុមាលភាពរបស់បងប្អូនយោធិន និងប្រជាពលរដ្ឋ។
អ្នកជំងឺទាំងអស់បានថ្លែងអំណរគុណចំពោះការយកចិត្តទុកដាក់ និងការលើកទឹកចិត្តពីលោកស្រី ដោយសន្យាថានឹងខិតខំព្យាបាលខ្លួនឱ្យបានឆាប់ជាសះស្បើយ។
ដោយ៖ តារា
