សមត្ថកិច្ចចម្រុះឃាត់ខ្លួនជនជាតិថៃ ៧៥នាក់ ក្នុងប្រតិបត្តិការបង្ក្រាបការឆបោកតាមប្រព័ន្ធអនឡាញ

ភ្នំពេញ៖ កម្លាំងសមត្ថកិច្ចចម្រុះកម្ពុជា បានធ្វើប្រតិបត្តិការបង្ក្រាបយ៉ាងធំមួយ ដោយឃាត់ខ្លួនជនជាតិថៃចំនួន ៧៥នាក់ ក្នុងនោះមានស្ត្រី ៤៨នាក់ នៅទីតាំងកសិដ្ឋានមួយកន្លែងឈ្មោះ “អមរៈ” ក្នុងភូមិកោះក្របី១ សង្កាត់ព្រែកថ្មី ខណ្ឌច្បារអំពៅ។

ប្រតិបត្តិការនេះធ្វើឡើងនៅរសៀលថ្ងៃទី០៩ ខែធ្នូ ឆ្នាំ២០២៥ ក្រោមការដឹកនាំរបស់លេខាធិការដ្ឋានគណៈកម្មការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (គ.ប.ឆ.ប.) ដោយសហការជាមួយអគ្គស្នងការដ្ឋាននគរបាលជាតិ និងអាជ្ញាធរពាក់ព័ន្ធផ្សេងៗទៀត។

សមត្ថកិច្ចបានចុះត្រួតពិនិត្យទីតាំងសង្ស័យបន្ទាប់ពីទទួលបានព័ត៌មានស្រាវជ្រាវថា មានការលបលួចប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (Online Scam)។ ក្នុងប្រតិបត្តិការនេះ សមត្ថកិច្ចក៏បានរឹបអូសសម្ភារៈជាវត្ថុតាងជាច្រើន រួមមានកុំព្យូទ័រយួរដៃ និងទូរសព្ទដៃ។

បច្ចុប្បន្ន ជនសង្ស័យទាំង៧៥នាក់ និងវត្ថុតាងត្រូវបានប្រគល់ជូនអគ្គស្នងការដ្ឋាននគរបាល ដើម្បីបន្តអនុវត្តតាមនីតិវិធីច្បាប់។ ទីតាំងកសិដ្ឋាន “អមរៈ” ត្រូវបានបិទបណ្តោះអាសន្ន។

សមត្ថកិច្ចជំនាញកំពុងសហការជាមួយអង្គភាពពាក់ព័ន្ធ ដើម្បីស្រាវជ្រាវបន្ថែម និងឈានទៅចាត់វិធានការផ្លូវច្បាប់ចំពោះមេខ្លោងនៃការឆបោកតាមប្រព័ន្ធបច្ចេកវិទ្យានេះ។

ក្នុងក្របខណ្ឌយុទ្ធនាការបោសសម្អាតការឆបោកតាមប្រព័ន្ធបច្ចេកវិទ្យា សមត្ថកិច្ចចម្រុះទូទាំងប្រទេសនឹងចាត់វិធានការតាមផ្លូវច្បាប់យ៉ាងតឹងរឹងបំផុតចំពោះមេខ្លោងទាំងឡាយដែលជាប់ពាក់ព័ន្ធនឹងអំពើឆបោកនេះ។