By រាជធានីភ្នំពេញ – តំណាងអចិន្ត្រៃយ៍កម្ពុជាប្រចាំអង្គការសហប្រជាជាតិ បានដាក់សំណើយ៉ាងធ្ងន់ធ្ងរទៅកាន់ក្រុមប្រឹក្សាសន្តិសុខអង្គការសហប្រជាជាតិ (UNSC) ដើម្បីទាមទារឱ្យកងកម្លាំងប្រដាប់អាវុធថៃបញ្ឈប់ជាបន្ទាន់នូវការឈ្លានពានដោយខុសច្បាប់មកលើកម្ពុជា។
នៅថ្ងៃទី១០ ខែធ្នូ ឆ្នាំ២០២៥ ឯកឧត្តម កែវ ឈា តំណាងអចិន្ត្រៃយ៍នៃព្រះរាជាណាចក្រកម្ពុជាប្រចាំអង្គការសហប្រជាជាតិ នៅទីក្រុងញូយ៉ក បានផ្ញើលិខិតជូនឯកឧត្តម Samuel Žbogar តំណាងអចិន្ត្រៃយ៍នៃសាធារណរដ្ឋស្លូវេនីប្រចាំអង្គការសហប្រជាជាតិ និងជាប្រធាន UNSC ដោយស្នើឱ្យយកចិត្តទុកដាក់ចំពោះសកម្មភាពឈ្លានពានប្រដាប់អាវុធដោយគ្មានការញុះញង់ជាមុន គ្មានហេតុផល និងខុសច្បាប់ពីសំណាក់កម្លាំងយោធាថៃ។
តំណាងកម្ពុជាបានរាយការណ៍ថា ចាប់ពីថ្ងៃទី៧ ខែធ្នូ ឆ្នាំ២០២៥ កងកម្លាំងយោធាថៃបានបើកការបាញ់ប្រហារមកលើទីតាំងកម្ពុជាដោយអាវុធធុនធ្ងន់ ហើយបន្តពង្រីកការវាយប្រហារទៅតំបន់ស៊ីវិលនៅខេត្តព្រះវិហារ ឧត្តរមានជ័យ បន្ទាយមានជ័យ ពោធិ៍សាត់ និងបាត់ដំបង។
ការវាយប្រហារបានប្រើប្រាស់យន្តហោះចម្បាំង រថក្រោះ កាំភ្លើងធុនធ្ងន់ និងបាញ់ផ្សែងពុល ដែលបណ្តាលឱ្យមានការបាត់បង់ជីវិត និងរបួសជាច្រើននាក់ រួមទាំងជនស៊ីវិលស្លូតត្រង់ ការបំផ្លិចបំផ្លាញផ្ទះសម្បែងប្រជាជន ហេដ្ឋារចនាសម្ព័ន្ធសាធារណៈ និងប្រាសាទព្រះវិហារ។
កម្ពុជាបានស្នើសុំឱ្យ UNSC ចាត់វិធានការចំនួន ៥ ចំណុច រួមមានការថ្កោលទោសការឈ្លានពាន ទាមទារឱ្យបញ្ឈប់ការវាយប្រហារ ទាមទារឱ្យគោរពច្បាប់មនុស្សធម៌អន្តរជាតិ និងបញ្ជូនបេសកកម្មស្វែងរកការពិតជាឯករាជ្យ។
ទោះជាត្រូវរងការវាយប្រហារយ៉ាងខ្លាំងក្តី កម្ពុជានៅតែប្តេជ្ញាចិត្តយ៉ាងមុតមាំចំពោះការសន្ទនាដោយសន្តិវិធី វិធីសាស្ត្រការទូត និងការគោរពច្បាប់អន្តរជាតិ ដោយរក្សាសិទ្ធិការពារខ្លួនតាមមាត្រា ៥១ នៃធម្មនុញ្ញអង្គការសហប្រជាជាតិ។
