ជម្លោះព្រំដែនកម្ពុជា-ថៃ ក្ដៅគគុកបន្ដ ទាហានថៃបាញ់ផ្លោងចូលដែនអធិបតេយ្យ ប្រើយន្តហោះទម្លាក់គ្រាប់បែក

(ព្រំដែន)៖ ស្ថានភាពជម្លោះព្រំដែនរវាងកម្ពុជា និងថៃ នៅតែក្ដៅគគុកយ៉ាងខ្លាំង ដោយគិតមកដល់ម៉ោង ១២:០០ ថ្ងៃត្រង់ ថ្ងៃទី១២ ខែធ្នូ ឆ្នាំ២០២៥។ កងទ័ពទាំងសងខាងកំពុងបន្ដប្រយុទ្ធគ្នាយ៉ាងសាហាវនៅតាមបន្ទាត់ព្រំដែនក្នុងខេត្តព្រះវិហារ ឧត្តរមានជ័យ និងបន្ទាយមានជ័យ។

យោធាថៃបានបន្ដបាញ់ចូលក្នុងដែនអធិបតេយ្យរបស់កម្ពុជា ដោយប្រើយន្តហោះទម្លាក់គ្រាប់បែក និងដ្រូន ដែលបង្កើនកម្រិតភាពតានតឹងយ៉ាងខ្លាំង។ នៅខេត្តឧត្តរមានជ័យ ជាពិសេសនៅសមរភូមិប្រាសាទតាមាន់ តាក្របី និងថ្មដូន ទាហានថៃបានបើកការបាញ់ប្រហារតាំងពីម៉ោងជាង ៦ព្រឹក។

នៅទិសព្រះវិហារ ក្នុងតំបន់ភ្នំខ្មោច អានសេះ និងជាំតែ ទាហានថៃក៏កំពុងបាញ់ផ្លោងចូលដែរ។ ចំណែកនៅខេត្តបន្ទាយមានជ័យ នៅសមរភូមិជោគជ័យ ភូមិព្រៃចាន់ និងបឹងត្រកួន ទាហានថៃកំពុងបាញ់គ្រាប់ផ្លោង ហើយបានបញ្ជូនទ័ពថ្មើរជើងបន្ថែមមកទៀត។

កងទ័ពកម្ពុជាកំពុងតស៊ូការពារដែនអធិបតេយ្យជាតិយ៉ាងរឹងមាំ ដោយអន្តរាគមន៍ពីអាជ្ញាធរពាក់ព័ន្ធកំពុងដំណើរការដើម្បីដោះស្រាយវិបត្តិនេះ។ ស្ថានភាពបច្ចុប្បន្ននៅតែតានតឹង និងមានហានិភ័យខ្ពស់។

ផ្ដល់សិទ្ធិដោយ៖ Fresh News