សម្តេចប៉ាបអំពាវនាវឲ្យបញ្ឈប់ជម្លោះព្រំដែនកម្ពុជា-ថៃ ជាបន្ទាន់

សម្តេចប៉ាប Leo XIV បានអំពាវនាវឲ្យមានការបញ្ឈប់ជាបន្ទាន់នូវការប្រយុទ្ធគ្នានៅតាមព្រំដែនកម្ពុជា-ថៃ កាលពីថ្ងៃពុធទី១០ ខែធ្នូ ឆ្នាំ២០២៥។ ទ្រង់បានមានបន្ទូលថា ទ្រង់ «មានការសោកស្តាយយ៉ាងខ្លាំង» ចំពោះរបាយការណ៍អំពីជនរងគ្រោះ និងការផ្លាស់ទីលំនៅដ៏ធំ។

យោងតាម Vatican News សម្តេចប៉ាបបានមានបន្ទូលថា ការប៉ះទង្គិចគ្នាថ្មីៗនេះបានសម្លាប់ទាំងទាហាន និងជនស៊ីវិល ហើយបង្ខំឲ្យមនុស្សរាប់ម៉ឺននាក់ភៀសខ្លួនចេញពីផ្ទះសម្បែងរបស់ពួកគេ។ ទ្រង់បានមានបន្ទូលទៅកាន់ហ្វូងមនុស្សនៅទីលាន St. Peter’s Square នៃបុរីវ៉ាទីកង់ថា «ខ្ញុំសូមសម្តែងនូវភាពស្និទ្ធស្នាលរបស់ខ្ញុំ ក្នុងការបួងសួងដល់ប្រជាជនជាទីស្រឡាញ់ទាំងនេះ»។

សម្តេចប៉ាបបានជំរុញឲ្យប្រទេសកម្ពុជា និងថៃ «បញ្ឈប់ការបាញ់ប្រហារជាបន្ទាន់ និងបន្តកិច្ចសន្ទនាឡើងវិញ» ដោយបន្ថែមថា មានតែកិច្ចចរចាប៉ុណ្ណោះដែលអាចទប់ស្កាត់ការឈឺចាប់បន្ថែមទៀត។

ក្នុងនាមជាមេដឹកនាំនៃសាសនាចក្ររ៉ូម៉ាំងកាតូលិក ដែលមានអ្នកកាន់តាមជាង១.៣ពាន់លាននាក់នៅទូទាំងពិភពលោក សម្តេចប៉ាបគឺជាសំឡេងដ៏មានឥទ្ធិពលបំផុតមួយក្នុងការទូតអន្តរជាតិ និងការតស៊ូមតិផ្នែកមនុស្សធម៌។ បុរីវ៉ាទីកង់ ដែលរក្សាទំនាក់ទំនងផ្លូវការជាមួយរដ្ឋជាង១៨០ តែងតែធ្វើអន្តរាគមន៍ក្នុងវិបត្តិសកលតាមរយៈការសម្របសម្រួលដោយស្ងាត់ស្ងៀម ឬការអំពាវនាវជាសាធារណៈឲ្យមានការអត់ធ្មត់។