By សៀមរាប – ក្រោមការដឹកនាំរបស់លោកជំទាវបណ្ឌិត ជា សិរី អគ្គទេសាភិបាលធនាគារជាតិនៃកម្ពុជា អំណោយជាច្រើនត្រូវបានប្រគល់ជូនគ្រួសារយោធិន និងប្រជាជនភៀសសឹកដែលរត់គេចពីជម្លោះព្រំដែនកម្ពុជា-ថៃ នៅវត្តប្រាសាទបូទុមមោង ស្រុកស្រីស្នំ ខេត្តសៀមរាប។
ការប្រគល់អំណោយនេះបានធ្វើឡើងក្រោមព្រះវត្តមានសម្ដេចព្រះមហាអរិយវង្សបណ្ឌិត យ៉ន សេងយៀត ព្រះសាកលវិទ្យាធិការនៃពុទ្ធិកសាកលវិទ្យាល័យព្រះសីហនុរាជ និងជាព្រះចៅអធិការវត្តឧណ្ណាលោម រួមជាមួយមហាឧបាសិកា ខៀវ ស៊ីណា ជា ចាន់តុ។
លោកជំទាវបណ្ឌិត ជា សិរី បាននាំនូវការផ្ដាំផ្ញើសួរសុខទុទ្ខពីសម្ដេចតេជោ ហ៊ុន សែន ប្រធានព្រឹទ្ធសភា សម្ដេចនាយករដ្ឋមន្ត្រី ហ៊ុន ម៉ាណែត និងលោកជំទាវបណ្ឌិត រួមទាំងថ្នាក់ដឹកនាំទាំងអស់ ជូនបងប្អូនប្រជាពលរដ្ឋដែលបានភៀសសឹកមកកាន់តំបន់នេះ។
លោកជំទាវបានសម្ដែងការសោកស្ដាយចំពោះប្រជាពលរដ្ឋខ្លះដែលបានរងការខូចខាតទ្រព្យសម្បត្តិ និងផ្ទះសម្បែងដោយសារការផ្លោងគ្រាប់ពីយោធាថៃ។
លោកជំទាវបណ្ឌិតបានស្នើសុំឱ្យប្រជាពលរដ្ឋភៀសសឹកទាំងអស់ស្នាក់នៅមណ្ឌលសុវត្ថិភាពនេះ រក្សាអនាម័យដោយហូបស្អាត ផឹកស្អាត បើមានបញ្ហាសុខភាពសូមរកក្រុមគ្រូពេទ្យដែលប្រចាំការជួយដល់បងប្អូននៅទីនេះ។
អំណោយដែលប្រគល់ជូននៅពេលនេះរួមមាន៖ ភួយ២ពាន់ភួយ ទឹកត្រី១ពាន់យួរ ទឹកស៊ីអ៊ីវ២៣០០យួរ ស្ករស អំបិល២ពាន់យួរ មី២រយកេស អង្ករ៣០តោន តង់ ត្រីងៀត សាច់ក្រក៦រយគីឡូក្រាម សាប៊ូ ឆៃពៅ ត្រីខ អាវរងា ទឹកសុទ្ធ សាច់ជ្រូកផាត់ និងថវិកាមួយចំនួន។
ការជួយសង្គ្រោះនេះបង្ហាញពីការយកចិត្តទុកដាក់របស់រដ្ឋាភិបាល និងស្ថាប័នជាតិចំពោះប្រជាពលរដ្ឋដែលរងគ្រោះដោយសារជម្លោះព្រំដែន។
