By (ព្រំដែន)៖ ទាហានថៃបានបន្តការបាញ់ផ្លោងចូលទឹកដីកម្ពុជានៅព្រឹកថ្ងៃទី១២ ខែធ្នូ ឆ្នាំ២០២៥នេះ ដោយចាប់ផ្ដើមតាំងពីម៉ោងជាង៦ព្រឹក រហូតដល់ម៉ោងជាង៨ព្រឹក។
នៅតំបន់ខេត្តឧត្តរមានជ័យ ជាពិសេសនៅសមរភូមិប្រាសាទតាមាន់ តាក្របី និងថ្មដូន ការបាញ់ប្រហារត្រូវបានបន្តយ៉ាងខ្លាំងក្លា។ ទាហានថៃបានប្រើគ្រាប់ផ្លោងយ៉ាងច្រើនចូលមកក្នុងទឹកដីកម្ពុជា។
នៅទិសព្រះវិហារ ក្នុងតំបន់ភ្នំខ្មោច និងអានសេះ ក៏មានការបាញ់ផ្លោងចូលដែរ។ ការវាយប្រហារនេះបានធ្វើឱ្យស្ថានភាពនៅតាមព្រំដែនកាន់តែតានតឹង។
ដោយឡែកនៅខេត្តបន្ទាយមានជ័យ នៅសមរភូមិជោគជ័យ ភូមិព្រៃចាន់ និងបឹងត្រកួន ទាហានថៃមិនត្រឹមតែបាញ់គ្រាប់ផ្លោងប៉ុណ្ណោះទេ ថែមទាំងបានបញ្ជូនទ័ពថ្មើរជើងបន្ថែមមកទៀតផង។
ទោះជាយ៉ាងណាក៏ដោយ កងកម្លាំងកម្ពុជាបានឈរជើងយ៉ាងរឹងមាំនៅលើទីតាំងរបស់ខ្លួន និងបន្តទប់ទល់នឹងការវាយប្រហារទាំងអស់។ នៅគ្រប់សមរភូមិ កងកម្លាំងរបស់យើងបានបង្ហាញពីសមត្ថភាពក្នុងការការពារទឹកដីជាតិ។
បច្ចុប្បន្ន ស្ថានភាពនៅតាមព្រំដែនកំពុងត្រូវបានតាមដានយ៉ាងជិតស្និទ្ធ ហើយកងកម្លាំងកម្ពុជាបន្តរក្សាភាពរឹងមាំក្នុងការការពារអធិបតេយ្យភាពជាតិ។
