By តូក្យូ – ក្នុងពេលដែលភាពតានតឹងក្នុងតំបន់កំពុងកើនឡើងខ្លាំង កងទ័ពអាកាសអាមេរិក និងជប៉ុន បានបើកធ្វើសមយុទ្ធអាកាសរួមគ្នានៅថ្ងៃទី១១ ធ្នូ ដោយមានការចូលរួមពីយន្តហោះទម្លាក់គ្រាប់បែកយុទ្ធសាស្ត្រ B-52 របស់អាមេរិក និងយន្តហោះប្រដេញជប៉ុន។
សកម្មភាពយោធានេះមកក្រោយពីកងយន្តហោះយោធាចិន និងរុស្ស៊ី បានហោះល្បាតរួមគ្នានៅជុំវិញប្រទេសជប៉ុន និងកូរ៉េខាងត្បូង ដែលបង្កើនភាពតានតឹងក្នុងតំបន់។ យន្តហោះទម្លាក់គ្រាប់បែក B-52 ចំនួន២គ្រឿង និងយន្តហោះប្រដេញជប៉ុន៦គ្រឿង បានធ្វើសមយុទ្ធអាកាសរួមក្នុងបរិយាកាសសន្តិសុខដែលកាន់តែដុនដាបឡើង។
សេនាធិការដ្ឋានកងទ័ពជប៉ុនបានរាយការណ៍ថា ក្រុងតូក្យូប្ដេជ្ញាមិនអនុញ្ញាតឲ្យមានការផ្លាស់ប្ដូរជាឯកតោភាគីនៃស្ថានភាពបច្ចុប្បន្នដោយកម្លាំងឡើយ។ សកម្មភាពនេះត្រូវបានចាត់ទុកថាជាការបង្ហាញសាច់ដុំពីជប៉ុន និងអាមេរិក ក្រោយសមយុទ្ធរួមរបស់រុស្ស៊ី និងចិន។
កាលពីថ្ងៃទី៨ ធ្នូ កងយន្តហោះប្រដេញចិនបានបាញ់ពន្លឺទៅរំខានរ៉ាដារបស់កងយន្តហោះជប៉ុន ខណៈភាពតានតឹងរវាងប្រទេសទាំងពីរកើនឡើងខ្លាំងក្រោយពីលោកស្រីសាណា អ៊ីតាកាអ៊ីជី ឡើងកាន់តំណែងនាយករដ្ឋមន្ត្រីជប៉ុន។ លោកស្រីតាកាអ៊ីជីបាននិយាយថា ក្រុងតូក្យូអាចជួយធ្វើអន្តរាគមន៍ក្នុងករណីចិនវាយប្រហារតៃវ៉ាន់។
សកម្មភាពយោធាទាំងនេះកើតឡើងនៅពេលដែលកងទ័ពជប៉ុន និងកងទ័ពកូរ៉េខាងត្បូងបានបញ្ចេញយន្តហោះប្រដេញទៅជាបន្ទាន់ ដើម្បីតាមដានសកម្មភាពរបស់ចិន និងរុស្ស៊ី។
អត្ថបទសរសេរដោយ ខាន់ សុខឃន
កែសម្រួលដោយ ស្រីណា
