ទេសរដ្ឋមន្ត្រី កែវ រ៉េមី ចាប់ផ្តើមវាយប្រហារពាក្យសម្តីអានុទីន ដោយចាត់ទុកថា ‘មិនគោរពជីវិតមនុស្ស’

(ភ្នំពេញ)៖ ទេសរដ្ឋមន្ត្រី កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា បានចេញសេចក្តីថ្លែងការណ៍យ៉ាងខ្លាំងក្លានៅថ្ងៃទី១៣ ខែធ្នូ ឆ្នាំ២០២៥ ដោយចាត់ទុកពាក្យសម្តីរបស់លោក អានុទីន ឆាន់វីរៈគុល ថាជា “សម្តីរបស់មនុស្សគ្មានមេត្តាធម៌ និងមិនគោរពជីវិតមនុស្ស”។

ការចេញមកបញ្ជាក់ដ៏ខ្លាំងក្លានេះ បានធ្វើឡើងក្រោយពីលោក អានុទីន ដែលជានាយករដ្ឋមន្ត្រីថៃដែលបានដាក់រត់ចោលកៅអី បានបង្ហោះលើបណ្តាញសង្គមថា យោធាថៃនឹងបន្តសកម្មភាពយោធាមកលើកម្ពុជា រហូតដល់លែងមានអារម្មណ៍ថាមានគ្រោះថ្នាក់ដល់ទឹកដីថៃ។

ទេសរដ្ឋមន្ត្រី កែវ រ៉េមី បានថ្លែងយ៉ាងច្បាស់ថា៖ «សម្តីទាំងនេះបង្ហាញថាគាត់ជាមនុស្សគ្មានមេត្តាធម៌ ជាមនុស្សព្រៃផ្សៃ និងមិនឱ្យតម្លៃទៅលើជីវិតមនុស្ស។ វាឆ្លុះបញ្ចាំងពីចិត្តគំនិតរបស់មេដឹកនាំចាំផ្ទះដែលចង់ឃើញកម្ពុជាធ្លាក់ខ្លួនជាប្រទេសទន់ខ្សោយ»។

ប្រធានគណៈកម្មាធិការសិទ្ធិមនុស្សកម្ពុជា បានបន្ថែមថា សម្តីបែបនេះកំពុងដុតកំហឹងដល់កូនចៅខ្មែរគ្រប់ជំនាន់ ដែលត្រៀមខ្លួនក្រោកឈរឡើងតស៊ូការពារទឹកដី។ លោកបានគូសបញ្ជាក់ពីប្រវត្តិសាស្ត្រចក្រភពខ្មែរ ដែលធ្លាប់មានមេត្តាធម៌ចំពោះកុលសម្ព័ន្ធតូចៗនៅជុំវិញក្រុងអង្គរ។

ទេសរដ្ឋមន្ត្រី កែវ រ៉េមី បានស្នើដំណោះស្រាយថា បញ្ញាវន្តថៃ ប្រជាជនថៃ និងអ្នកនយោបាយថៃដែលស្រឡាញ់សន្តិភាព ត្រូវរួបរួមគ្នាជ្រើសរើសមេដឹកនាំថ្មីដែលមានគុណសម្បត្តិល្អ ដើម្បីកសាងព្រំដែនសន្តិភាពជាមួយកម្ពុជា។ លោកព្រមានថា បើមិនដូច្នេះទេ ការបង្ហូរឈាមនៃប្រជាជនទាំងពីរនឹងបន្តហូរគ្មានទីបញ្ចប់។

ព្រឹត្តិការណ៍នេះកំពុងធ្វើឱ្យស្ថានភាពទំនាក់ទំនងកម្ពុជា-ថៃ កាន់តែតានតឹង និងជាប្រធានបទដ៏សំខាន់សម្រាប់ការអង្កេតពីសង្គមអន្តរជាតិ៕