By កណ្ដាល៖ នគរបាលស្រុកស្អាងបានឃាត់ខ្លួនយុវជនម្នាក់ក្នុងអំឡុងពេលយប់ថ្ងៃទី៦ ធ្នូ ២០២៥ ក្រោយពីជនសង្ស័យនេះបានរំលោភសេពសន្ថវះសិស្សអាយុត្រឹម១២ឆ្នាំចំនួនពីរដងក្នុងរយៈពេលមួយខែ។
យុវជនសង្ស័យឈ្មោះ ចន្ធី សុវណ្ណារិទ្ធ អាយុ១៨ឆ្នាំ ដែលមានសារធាតុញៀនវិជ្ជមាន ត្រូវបានឃាត់ខ្លួននៅភូមិពោធិតាប៉ាង ឃុំស្វាយប្រទាល ស្រុកស្អាង។ ជនសង្ស័យនេះបានសារភាពទទួលស្គាល់ទង្វើរបស់ខ្លួននៅចំពោះមុខសមត្ថកិច្ច។
ហេតុការណ៍ទីមួយបានកើតឡើងនៅថ្ងៃទី១១ វិច្ឆិកា ២០២៥ នៅពេលជនរងគ្រោះឈ្មោះ ទ ស-ន អាយុ១២ឆ្នាំ កំពុងជិះកង់ត្រឡប់ផ្ទះតែម្នាក់ឯង។ ជនសង្ស័យបានចាប់កង់ផ្តួល វ៉ៃដៃមួយចំទ្រូង និងគំរាមសម្លាប់មុននឹងទាញយកទៅចំការដូងដើម្បីរំលោភ។
ហេតុការណ៍ទីពីរកើតឡើងនៅថ្ងៃទី៦ ធ្នូ ២០២៥ នៅពេលជនរងគ្រោះត្រឡប់ពីខួបកំណើតមិត្តភក្តិ។ ជនសង្ស័យបានឈរកាក់ពីមុខ លួងលោមថានឹងឲ្យរបស់ រួចទាញយកទៅចំការស្វាយដើម្បីរំលោភម្តងទៀត។
ថ្ងៃទី១២ ធ្នូ ជនរងគ្រោះបានហ៊ានរៀបរាប់ហេតុការណ៍ទាំងអស់ដល់គ្រួសារ និងទៅដាក់ពាក្យប្តឹងនៅប៉ុស្តិ៍នគរបាលរដ្ឋបាលស្វាយប្រទាល។ សមត្ថកិច្ចបានចាត់វិធានការរហ័ស និងឃាត់ខ្លួនជនសង្ស័យបានទាន់ពេលវេលា។
បច្ចុប្បន្ន ជនសង្ស័យត្រូវបានឃាត់ខ្លួនបណ្ដោះអាសន្ននៅអធិការដ្ឋាននគរបាលស្រុកស្អាង ដើម្បីកសាងសំណុំរឿងចាត់ការតាមនីតិវិធី។ ករណីនេះបានធ្វើឲ្យសហគមន៍មានការព្រួយបារម្ភយ៉ាងខ្លាំង និងអំពាវនាវឲ្យគ្រួសារត្រូវថែរក្សាកូនចៅឱ្យបានជិតស្និទ្ធ។
