ត្រាំសន្យាសងសឹកបន្ទាន់បន្ទាប់ពីក្រុមអាយស៊ីសសម្លាប់ទាហានអាមេរិក២នាក់នៅស៊ីរី

វ៉ាស៊ីនតោន៖ ប្រធានាធិបតីអាមេរិក លោក ដូណាល់ ត្រាំ បានសន្យានឹងសងសឹកយ៉ាងខ្លាំងក្រោយពីក្រុមភេរវកម្មអាយស៊ីសបានវាយប្រហារធ្វើឱ្យទាហានអាមេរិក២នាក់ និងអ្នកបកប្រែភាសាម្នាក់ស្លាប់នៅស៊ីរី។

លោកត្រាំបានថ្លែងយ៉ាងច្បាស់ថា៖ “យើងត្រូវតែសងសឹកករណីនេះ។ នេះជាការវាយប្រហារដ៏ឃោរឃៅមួយដែលមិនអាចទទួលយកបាន។” កាលពីមុន លោកបានបង្ហោះសារនៅលើបណ្ដាញសង្គមដោយបង្ហាញការខឹងសម្បាយ៉ាងខ្លាំងចំពោះហេតុការណ៍នេះ។

មន្ត្រីរដ្ឋាភិបាលស៊ីរីបានបញ្ជាក់ថា ទាហានអាមេរិក និងអ្នកបកប្រែបានល្បាតរួមគ្នាជាមួយទាហានស៊ីរី ហើយត្រូវបានវាយប្រហារដោយភ្លាមៗ។ បញ្ជាការដ្ឋានកណ្ដាលកងទ័ពអាមេរិកបានបញ្ជាក់ពីការស្លាប់នេះនៅលើបណ្ដាញសង្គម បន្ទាប់ពីការផ្សាយព័ត៌មានរបស់ស៊ីរីដែលរាយការណ៍ថាការវាយប្រហារមួយបានកើតឡើងនៅទីក្រុងប៉ាល់មីរ៉ា។

ជនប្រដាប់អាវុធរបស់ក្រុមអាយស៊ីសម្នាក់បានបើកប្រតិបត្តិការវាយឆ្មក់បណ្ដាលឱ្យស្លាប់ជនជាតិអាមេរិកបីនាក់ និងរបួសទាហានបីនាក់ទៀត។ ជនប្រដាប់អាវុធរូបនោះក៏ត្រូវបានវាយបកវិញ និងស្លាប់ក្នុងព្រឹត្តិការណ៍នេះដែរ។

អ្នកនាំពាក្យមន្ទីរបញ្ចកោណបានពន្យល់ថា ការវាយប្រហារនេះកើតឡើងនៅពេលទាហានអាមេរិកកំពុងចូលរួមក្នុងយុទ្ធនាការសំខាន់មួយដើម្បីគាំទ្រប្រតិបត្តិការប្រឆាំងអំពើភេរវកម្ម។

បេសកជនរបស់អាមេរិកប្រចាំប្រទេសស៊ីរីបានបន្ថែមថា គោលដៅនៃការវាយឆ្មក់នេះគឺក្រុមល្បាតរួមគ្នារវាងទាហានអាមេរិក និងស៊ីរី។ អត្តសញ្ញាណរបស់ទាហានអាមេរិកដែលស្លាប់នឹងត្រូវរក្សាទុកជាការណ៍សម្ងាត់រហូតដល់ក្រុមគ្រួសារទទួលយកសពរបស់ពួកគេ។

នេះជាករណីស្លាប់ទាហានអាមេរិកលើកទី១ក្នុងរយៈពេលមួយឆ្នាំចាប់តាំងពីរដ្ឋាភិបាលថ្មីឡើងកាន់អំណាចនៅប្រទេសស៊ីរី។ ប្រភពពីមន្ត្រីយោធាស៊ីរីបានបង្ហាញថា ការបាញ់ប្រហារនោះកើតឡើងនៅពេលមានកិច្ចប្រជុំរវាងមន្ត្រីយោធាអាមេរិក និងស៊ីរីនៅឯមូលដ្ឋានយោធានៃទីក្រុងប៉ាល់មីរ៉ា។

មន្ត្រីម្នាក់នៅមន្ទីរបញ្ចកោណបានបញ្ជាក់ថា ការបាញ់ប្រហារនោះកើតឡើងនៅក្នុងទីតាំងដែលមិនស្ថិតក្រោមការគ្រប់គ្រងរបស់រដ្ឋាភិបាលស៊ីរី។ ព័ត៌មាននេះត្រូវបានផ្សាយតាមរយៈឆេនណលញូស៍អេស៊ា និងប្រភពដទៃទៀត។