By ខេត្តកណ្ដាល៖ មន្ត្រីនគរបាលនៃអធិការដ្ឋាននគរបាលក្រុងតាខ្មៅបានបញ្ជាក់ថា ជនសង្ស័យម្នាក់ដែលទើបនឹងចេញពីពន្ធនាគារ ហើយមានសារធាតុញៀនក្នុងខ្លួន ត្រូវបានកម្លាំងនគរបាលឃាត់ខ្លួនបន្ទាប់ពីធ្វើសកម្មភាពលួចកោដ្ឋដាក់ធាតុរបស់អ្នកភូមិយកទៅបោកកម្ទេចចោល ដើម្បីស្វែងរកលុយ។
ហេតុការណ៍នេះបានកើតឡើងនៅវេលាម៉ោង ១២:៥៣នាទី ថ្ងៃទី១២ ខែធ្នូ ឆ្នាំ២០២៥ នៅមុខផ្ទះជនរងគ្រោះ ក្នុងភូមិលេខ២ សង្កាត់ស្វាយរលំ ក្រុងតាខ្មៅ។ លោកវរសេនីយ៍ឯក យី វណ្ណដា អធិការនគរបាលក្រុងតាខ្មៅបានឲ្យដឹងថា ជនសង្ស័យដែលត្រូវបានឃាត់ខ្លួនមានឈ្មោះ ពៅ តុលា ហៅតុ អាយុ ២៣ឆ្នាំ ដែលពិនិត្យទឹកនោមរកឃើញមានសារធាតុញៀន និងធ្លាប់ជាប់ពន្ធនាគារខេត្តកណ្តាលរយៈពេល ២ឆ្នាំ។
ជនរងគ្រោះមានចំនួន ២នាក់ គឺឈ្មោះ វី ស្រីឡែន អាយុ ៣១ឆ្នាំ និង មឹម នី អាយុ ៥០ឆ្នាំ ដែលរស់នៅក្នុងភូមិសង្កាត់ដដែល។ លោកអធិការបានបន្តថា ជនសង្ស័យបានធ្វើសកម្មភាពចូលលួចកោដ្ឋដាក់ធាតុ រួចយកទៅបោកឱ្យបែកនៅនឹងកន្លែង ដើម្បីយកលុយដែលគេដាក់ក្នុងនោះ។
ក្រោយពីឃើញសភាពកើតហេតុ ជនរងគ្រោះបានទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលស្វាយរលំ ដែលនាំឱ្យមានការឃាត់ខ្លួនជនសង្ស័យភ្លាមៗ។ លោកវរសេនីយ៍ឯក យី វណ្ណដា បានបញ្ជាក់ថា សមត្ថកិច្ចបានរកឃើញកម្ទេចកោដ្ឋដាក់ឆ្អឹងមួយចំនួននៅកន្លែងកើតហេតុ។
នៅចំពោះមុខសមត្ថកិច្ច ជនសង្ស័យបានឆ្លើយសារភាពថា ពិតជាបានធ្វើសកម្មភាពលួចកោដ្ឋដើម្បីបោកបំបែកយកលុយ។ បច្ចុប្បន្ន ជនសង្ស័យត្រូវបានឃាត់ខ្លួនបណ្តោះអាសន្ននៅអធិការដ្ឋាននគរបាលក្រុងតាខ្មៅ ដើម្បីកសាងសំណុំរឿងតាមនីតិវិធីច្បាប់។
