ថៃបិទច្រកដឹកប្រេងទៅឡាវ ចោទប្រកាន់ថាប្រេងត្រូវបានបង្វែរទៅកម្ពុជា

រដ្ឋាភិបាលថៃបានបញ្ជាឱ្យបិទច្រកដឹកជញ្ជូនប្រេងឥន្ធនៈទាំងអស់ឆ្លងកាត់ច្រក Chong Mek ចូលទៅប្រទេសឡាវ បន្ទាប់ពីមានព័ត៌មានថា ប្រេងទាំងនោះត្រូវបានបង្វែរទៅឱ្យកងទ័ពកម្ពុជា។

លោក Surasant Kongsiri អ្នកនាំពាក្យក្រសួងការពារជាតិថៃបានបញ្ជាក់ថា៖ “យើងបានរឹតបន្តឹងការត្រួតពិនិត្យគ្រប់ការដឹកជញ្ជូនប្រេងឆ្លងកាត់ច្រកនេះ ដោយសារតែព័ត៌មានសម្ងាត់បង្ហាញថា ប្រេងឥន្ធនៈត្រូវបានបង្វែរទៅកាន់កម្ពុជា។ ទោះជាយ៉ាងណា វិធានការនេះមិនប៉ះពាល់ដល់សន្តិសុខថាមពលរបស់ឡាវទេ។”

យោងតាមការចុះផ្សាយរបស់ទីភ្នាក់ងារព័ត៌មានរ៉យទ័រ និង Khaosod រថយន្តដឹកប្រេងជាង ៨០ គ្រឿង ដែលអាចផ្ទុកប្រេងឥន្ធនៈបានជាង ៤ លានលីត្រ កំពុងជាប់គាំងនៅច្រកត្រួតពិនិត្យ Chong Mek។ រថយន្តទាំងនេះត្រូវរង់ចាំការអនុញ្ញាតចូលទៅប្រទេសឡាវ។

ក្រសួងការបរទេសឡាវមិនទាន់ឆ្លើយតបចំពោះការចោទប្រកាន់នេះទេ ខណៈដែលក្រសួងថាមពលថៃបានបញ្ជាក់ពីមុនថា គ្មានការនាំចេញប្រេងទៅកម្ពុជាតាំងពីខែកក្កដាមក។

ទិន្នន័យពីក្រុមហ៊ុន Kpler បង្ហាញថា សិង្ហបុរីបានក្លាយជាអ្នកផ្គត់ផ្គង់ប្រេងឥន្ធនៈធំបំផុតរបស់កម្ពុជា ដោយផ្គត់ផ្គង់ប្រហែល ៩១៥,០០០ តោនក្នុងឆ្នាំនេះ។ ការផ្គត់ផ្គង់ពីថៃបានធ្លាក់ចុះយ៉ាងខ្លាំង ពី ១៨០,០០០ តោនក្នុងឆ្នាំមុន មកត្រឹម ៣០,០០០ តោនក្នុងឆ្នាំនេះ។

ស្ថានភាពតានតឹងនៅតាមព្រំដែនកម្ពុជា-ថៃប្រវែងជាង ៨០០ គីឡូម៉ែត្រនៅតែបន្ត ដោយគ្មានសញ្ញាណាមួយនៃការថមថយ ទោះបីជាមានការអំពាវនាវពីសហគមន៍អន្តរជាតិក៏ដោយ។