វៀតណាមបើករោងចក្រឧស្ម័នធម្មជាតិពង្រាវដំបូងគេ ក្រោមយុទ្ធសាស្ត្រថាមពលស្អាត

រោងចក្រថាមពលដើរដោយឧស្ម័នធម្មជាតិពង្រាវ (LNG) ដំបូងគេរបស់វៀតណាម ត្រូវបានបើកដំណើរការជាផ្លូវការកាលពីថ្ងៃអាទិត្យកន្លងមក ដោយនាយករដ្ឋមន្ត្រីផាំ មិញ ឈិញ។

រោងចក្រដែលមានឈ្មោះថា Nhơn Trạch 3 & 4 ត្រូវចំណាយទុនវិនិយោគជិត ១,៤ ប៊ីលានដុល្លារ និងសាងសង់ឡើងដោយក្រុមហ៊ុនរដ្ឋ Petrovietnam។ រោងចក្រនេះមានសមត្ថភាពបង្កើតថាមពលជាង ៩ ប៊ីលានគីឡូវ៉ាត់ម៉ោងក្នុងមួយឆ្នាំ ដោយមានសមត្ថភាពសរុប ១,៦២៤ មេហ្គាវ៉ាត់។

ការបើកដំណើរការរោងចក្រនេះ គឺជាផ្នែកមួយនៃយុទ្ធសាស្ត្រផ្លាស់ប្តូរទៅរកថាមពលស្អាត និងជំរុញសន្តិសុខថាមពលរបស់វៀតណាម។ រោងចក្រនេះនឹងផ្តល់ថាមពលដែលមានស្ថេរភាព និងអាចបត់បែនបាន ដើម្បីគាំទ្រដល់បណ្តាញអគ្គិសនីជាតិ។

រោងចក្រ LNG ថ្មីនេះ ឆ្លើយតបទៅនឹងកំណើនតម្រូវការអគ្គិសនីរបស់វៀតណាម ដែលតម្រូវឱ្យមានការបន្ថែមអគ្គិសនីពី ៦,៥០០ ទៅ ៨,០០០ មេហ្គាវ៉ាត់ជារៀងរាល់ឆ្នាំ។ ការប្រើប្រាស់ថាមពលកំពុងកើនឡើងដល់ ៥៤,៥០០ មេហ្គាវ៉ាត់ ដោយកំណើនអគ្គិសនីលើសពីកំណើនសេដ្ឋកិច្ចពី ១,៥ ទៅ ២ ដង។

ការពង្រីកថាមពលនេះស្របទៅនឹងការអភិវឌ្ឍន៍ឧស្សាហកម្មបច្ចេកវិទ្យាខ្ពស់ ការផលិតបន្ទះឈីប មជ្ឈមណ្ឌលទិន្នន័យ និងហេដ្ឋារចនាសម្ព័ន្ធផ្លូវដែកល្បឿនលឿនរបស់វៀតណាម។