ត្រាំស្នើសុំចិនដោះលែងមហាសេដ្ឋីហុងកុង បន្ទាប់ពីតុលាការកាត់ទោសជាប់ពន្ធនាគារអស់មួយជីវិត

ភ្នំពេញ – ប្រធានាធិបតីអាមេរិក ដូណាល់ ត្រាំ បានសម្តែងការខកចិត្តយ៉ាងខ្លាំងចំពោះការកាត់ទោសរបស់តុលាការហុងកុងលើមហាសេដ្ឋី Jimmy Lai ដែលត្រូវបានកាត់ទោសជាប់ពន្ធនាគារអស់មួយជីវិត។

កាលពីថ្ងៃចន្ទទី១៥ធ្នូ លោកត្រាំបាននិយាយជាមួយអ្នកយកព័ត៌មាននៅការិយាល័យ Oval ថា៖ «មែនទែនទៅ គាត់គ្រាន់តែបុរសចំណាស់ម្នាក់ ហើយសុខភាពក្នុងរាងកាយក៏មិនស្រួលដែរ។ ខ្ញុំបាននិយាយជាមួយប្រធានាធិបតីចិន ស៊ី ជីនពីង ហើយស្នើសុំឲ្យគាត់ពិចារណាដោះលែងលោក Lai។»

តាមរបាយការណ៍របស់ NHK តុលាការហុងកុងបានរកឃើញថា លោក Jimmy Lai ដែលជាស្ថាបនិកកាសែត Apple Daily មានទោសពីបទឃុបឃិតជាមួយកងកម្លាំងបរទេស និងបោះពុម្ពផ្សាយសម្ភារៈញុះញង់ ក្រោមច្បាប់សន្តិសុខជាតិរបស់ចិន។

លោក Lai ត្រូវបានចាប់ខ្លួននៅឆ្នាំ២០២០ ក្រោមច្បាប់សន្តិសុខជាតិដែលទីក្រុងប៉េកាំងបានដាក់ចេញ ដើម្បីបង្ក្រាបការតវ៉ាប្រឆាំងរដ្ឋាភិបាលនៅហុងកុង។ កាសែត Apple Daily ដែលធ្លាប់រិះគន់រដ្ឋាភិបាលចិន ត្រូវបានបិទនៅឆ្នាំ២០២១។

ប្រទេសលោកខាងលិចបានថ្កោលទោសការកាត់ក្តីនេះ ដោយចោទប្រកាន់ថាទីក្រុងប៉េកាំងបានបង្ក្រាបសេរីភាពនៃការបញ្ចេញមតិ។ លោកត្រាំបានបញ្ជាក់ថា លោកនឹងធ្វើអ្វីគ្រប់យ៉ាងដែលអាចធ្វើបានដើម្បីជួយសង្គ្រោះលោក Lai។

លោក Lai ដែលមានអាយុ៧៦ឆ្នាំ បានឃុំខ្លួនអស់រយៈពេលជិត៥ឆ្នាំមកហើយ ហើយសុខភាពរបស់គាត់កំពុងធ្លាក់ចុះយ៉ាងខ្លាំង។ ការកាត់ទោសនេះបានធ្វើឱ្យមានការរិះគន់យ៉ាងខ្លាំងពីសហគមន៍អន្តរជាតិ។