ហ្សេលេនស្គី ប្តូរយុទ្ធសាស្ត្រ៖ សុខចិត្តលះបង់ការចូលណាតូ បើលោកខាងលិចធានាសន្តិសុខឱ្យអ៊ុយក្រែន

ប្រធានាធិបតីអ៊ុយក្រែន លោក Volodymyr Zelenskyy បានបង្ហាញពីការផ្លាស់ប្តូរយុទ្ធសាស្ត្រសន្តិសុខយ៉ាងសំខាន់ ដោយព្រមលះបង់ការចូលជាសមាជិកអង្គការណាតូ បើលោកខាងលិចផ្តល់ការធានាសន្តិសុខដោយផ្ទាល់ដល់ប្រទេសរបស់លោក។

ការប្រកាសនេះធ្វើឡើងក្នុងជំនួបជាមួយប្រេសិតអាមេរិក Steve Witkoff នៅទីក្រុងបែរឡាំង ប្រទេសអាល្លឺម៉ង់ កាលពីថ្ងៃអាទិត្យទី១៤ ខែធ្នូ ឆ្នាំ២០២៥។ លោក Zelenskyy បានបញ្ជាក់ថា៖ «ចាប់ពីដំបូង អ៊ុយក្រែនចង់ចូលណាតូណាស់ ព្រោះវាជាការធានាសន្តិសុខយ៉ាងពិតប្រាកដ។ ប៉ុន្តែដៃគូមួយចំនួនមិនគាំទ្រទិសដៅនេះទេ។ ដូច្នេះ ការធានាសន្តិសុខទ្វេភាគីជាមួយសហរដ្ឋអាមេរិក និងសហការីអឺរ៉ុប គឺជាជម្រើសដ៏ល្អមួយ។»

រុស្ស៊ីបានអះអាងថា ការចូលណាតូរបស់អ៊ុយក្រែនជាកត្តាបង្កសង្គ្រាម ហើយបានព្រមានថា បើការចូលនេះកើតឡើង ទ្វីបអឺរ៉ុបនឹងជួបមហន្តរាយ។ អ្នកនាំពាក្យក្រសួងការបរទេសរុស្ស៊ីលោកស្រី Maria Zakharova បានលើកឡើងថា មូស្គូមិនអាចទទួលយកសមាជិកភាពណាតូរបស់អ៊ុយក្រែនបានឡើយ។

ប្រេសិតអាមេរិក Witkoff បានថ្លែងថា ជំនួបជាមួយលោក Zelenskyy ទទួលបានលទ្ធផលគួរឱ្យកត់សម្គាល់។ ការផ្លាស់ប្តូរយុទ្ធសាស្ត្រនេះបង្ហាញពីភាពអត់ធ្មត់ និងការស្វែងរកដំណោះស្រាយថ្មីក្នុងការទប់ស្កាត់ការឈ្លានពានរបស់រុស្ស៊ី។

អត្ថបទ៖ សុខ សុវណ្ណ