By រាជធានីភ្នំពេញ៖ ក្រសួងសុខាភិបាលបានបញ្ជាក់ជាថ្មីពីការយកចិត្តទុកដាក់ខ្ពស់បំផុតរបស់ខ្លួនក្នុងការធានាការសង្គ្រោះព្យាបាលវីរកងទ័ពជួរមុខដែលរងរបួស ដោយធ្វើជាអាទិភាពលំដាប់ទីមួយ។
នៅរសៀលថ្ងៃចន្ទទី១៥ ខែធ្នូ ឆ្នាំ២០២៥ លោក ឈាង រ៉ា រដ្ឋមន្ត្រីក្រសួងសុខាភិបាល បានអញ្ជើញចុះសួរសុខទុក្ខវីរកងទ័ពដែលកំពុងសម្រាកព្យាបាលជំងឺនៅមន្ទីរពេទ្យកាល់ម៉ែត។
លោកបានចូលរួមដឹកនាំការប្រជុំក្រុមគ្រូពេទ្យឯកទេសពហុជំនាញ ដើម្បីតាមដាន និងពិនិត្យវឌ្ឍនភាព ប្រសិទ្ធភាព និងតម្រូវការការថែទាំព្យាបាលបម្រើជូនវីរកងទ័ព រហូតបានជាសះស្បើយ។
លោកបានពាំនាំនូវពាក្យផ្តាំផ្ញើ សួរសុខទុក្ខដោយក្តីបារម្ភដ៏ខ្ពង់ខ្ពស់បំផុតរបស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ព្រមទាំងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវ ជូនចំពោះបងប្អូនវីរកងទ័ពដែលកំពុងសម្រាកព្យាបាលជំងឺ។
ការទស្សនកិច្ចនេះបង្ហាញពីការយកចិត្តទុកដាក់ពិសេសរបស់រដ្ឋាភិបាលកម្ពុជាចំពោះសុខភាព និងសុខុមាលភាពរបស់វីរកងទ័ព ដែលជាអ្នកការពារសន្តិសុខ និងអធិបតេយ្យភាពជាតិ។
ក្រសួងសុខាភិបាលបានបញ្ជាក់ថា ការសង្គ្រោះព្យាបាលវីរកងទ័ពជួរមុខគឺជាអាទិភាពខ្ពស់បំផុត ហើយនឹងបន្តផ្តល់សេវាថែទាំព្យាបាលដ៏ល្អបំផុតដល់បងប្អូនវីរកងទ័ពទាំងអស់។
អត្ថបទសរសេរដោយ សហការី កែសម្រួលដោយ កៀន សុឃាក់
