By (ភ្នំពេញ)៖ លោក នេត្រ ភក្ត្រា រដ្ឋមន្ត្រីក្រសួងព័ត៌មាន បានបង្ហាញពីការកើនឡើងយ៉ាងគំហុកនៃជនស៊ីវិលដែលបាត់បង់ជីវិតដោយសារសកម្មភាពឈ្លានពានរបស់យោធាថៃ នៅព្រឹកថ្ងៃទី១៥ ធ្នូ ២០២៥។ តួលេខថ្មីបង្ហាញថា មានជនស៊ីវិលស្លាប់ ១២នាក់ របួស ៧៤នាក់ និងជនភៀសសឹកលើសពី ៤០ម៉ឺននាក់។
យោធាថៃបានប្រើប្រាស់អាវុធធុនធ្ងន់ជាច្រើន រួមទាំងយន្តហោះចម្បាំង និងគ្រាប់បែកចង្កោម ដើម្បីវាយប្រហារលើអធិបតេយ្យ និងបូរណភាពទឹកដីកម្ពុជា។ ក្នុងរយៈពេល ៩ថ្ងៃចុងក្រោយនេះ យោធាថៃបានយកជនស៊ីវិលជាគោលដៅដោយផ្ទាល់ រួមមានផ្ទះសម្បែង ភូមិដ្ឋាន ស្ពានថ្នល់ សាលារៀន មន្ទីរពេទ្យ វត្តអារ៉ាម ប្រាសាទព្រះវិហារ និងប្រាសាទតាក្របី។
ត្រឹមល្ងាចថ្ងៃទី១៤ ធ្នូ ២០២៥ ចំនួនជនភៀសសឹកដែលភៀសខ្លួនពីសកម្មភាពឈ្លានពានមានចំនួន ១២០,៨១៤គ្រួសារ ស្មើនឹង ៤០៣,៦០១នាក់។ ក្នុងនោះមានស្ត្រី ២០៨,២៦៦នាក់ និងកុមារ ៩៧,២០៩នាក់។
រដ្ឋមន្ត្រីក្រសួងព័ត៌មានបានចង្អុលបង្ហាញថា ភាគីថៃត្រូវទទួលខុសត្រូវចំពោះសកម្មភាពរំលោភឈ្លានពានលើទឹកដីកម្ពុជា និងការយកជនស៊ីវិលជាគោលដៅ។ នេះជាការរំលោភបំពានយ៉ាងធ្ងន់ធ្ងរលើច្បាប់អន្តរជាតិ និងសិទ្ធិមនុស្ស។
