ត្រាំគំរាមដាក់ពន្ធគយលើកម្ពុជា-ថៃ បើមិនបញ្ឈប់សង្គ្រាមព្រំដែន

អាមេរិកបានដាក់សម្ពាធខ្លាំងលើកម្ពុជា និងថៃ ដោយគំរាមដាក់ពន្ធគយថ្មី ប្រសិនបើប្រទេសទាំងពីរបរាជ័យក្នុងការបញ្ឈប់អរិភាពនៅតាមព្រំដែនជម្លោះ។ ប្រធានាធិបតីដូណាល់ ត្រាំ បានប្រកាសថា ពន្ធគយគឺជាឧបករណ៍ចាំបាច់ក្នុងគោលនយោបាយការបរទេសរបស់លោក ដើម្បីបង្ខំឲ្យមានបទឈប់បាញ់។

នៅក្នុងបទសម្ភាសន៍ជាមួយ The Wall Street Journal លោកត្រាំបានព្រមានថា ការបន្តប្រយុទ្ធគ្នានឹងជំរុញឲ្យអាមេរិកលុបចោលកិច្ចព្រមព្រៀងពាណិជ្ជកម្ម និងដំឡើងពន្ធគយជាការដាក់ទណ្ឌកម្ម។ ការគំរាមនេះបានមកបន្ទាប់ពីការហៅទូរសព្ទជាមួយនាយករដ្ឋមន្ត្រីថៃ លោកអានុទីន ឆានវីរៈគុល និងនាយករដ្ឋមន្ត្រីកម្ពុជា សម្ដេចហ៊ុន ម៉ាណែត។

លោកត្រាំបានបញ្ជាក់ថា មេដឹកនាំទាំងពីរបានយល់ព្រមបញ្ឈប់អរិភាពក្នុងរយៈពេល២៤ម៉ោង បើទោះបីជាការប៉ះទង្គិចគ្នានៅតែបន្តកើតមានក៏ដោយ។ សម្ដីនេះបានកើតឡើងចំពេលដែលមានអំពើហិង្សាជាថ្មីនៅតាមព្រំដែនកម្ពុជា-ថៃ កាលពីថ្ងៃទី៧ធ្នូ ដែលបានរីករាលដាលទៅជាការវាយប្រហារតាមផ្លូវអាកាស។

ទោះបីជាមានការអំពាវនាវពីអាមេរិកក៏ដោយ លោកអានុទីនបានប្រកែកមិនព្រមស្ដាប់ ហើយថែមទាំងនិយាយដោយផ្គើនថា គ្មានកិច្ចព្រមព្រៀងបទឈប់បាញ់ណាមួយត្រូវបានដាក់ឲ្យប្រើប្រាស់ទេ ហើយប្រទេសថៃនឹងបន្តប្រយុទ្ធដោយមិនខ្វល់ពីការអំពាវនាវរបស់អន្តរជាតិឡើយ។