ថៃចាត់ការបញ្ជូនមន្ត្រីពិនិត្យការខូចខាតក្រោយមីយ៉ាន់ម៉ាទម្លាក់គ្រាប់បែកកម្ទេចសម្បុក Scammer នៅ KK Park

ភាគីថៃបានចាត់ការបញ្ជូនក្រុមមន្ត្រីឆ្លងដែនទៅកាន់តំបន់ព្រំដែនមីយ៉ាន់ម៉ា ដើម្បីពិនិត្យការខូចខាតក្រោយកងទ័ពមីយ៉ាន់ម៉ាទម្លាក់គ្រាប់បែកកម្ទេចអគារសម្បុក Scammer នៅតំបន់សេដ្ឋកិច្ចពិសេស KK Park និង Shwe Kokko។

តាមការផ្សាយរបស់ Bangkok Post នៅថ្ងៃចន្ទទី១៥ខែធ្នូឆ្នាំ២០២៥ អាជ្ញាធរថៃដែលមានសហការជាមួយមន្ត្រីចិន បានធ្វើដំណើរពីខេត្ត Tak ឆ្លងដែនចូលទៅតំបន់ Myawaddy នៃប្រទេសមីយ៉ាន់ម៉ា ដើម្បីជួបជាមួយភាគីមីយ៉ាន់ម៉ា ពិនិត្យការខូចខាត។

ក្នុងអំឡុងពេលនោះ ភាគីទាំងពីរបានឯកភាពដោះដូរព័ត៌មានគ្នា រឹតបណ្តឹងការតភ្ជាប់អគ្គិសនី និងប្រគល់ Scammer ឲ្យគ្នាទៅវិញទៅមក។

សូមជម្រាបជាថ្មី កាលពីចុងសប្តាហ៍ កងទ័ពរដ្ឋាភិបាលបានទម្លាក់គ្រាប់បែក កម្ទេចអគាររបស់ក្រុមឧក្រិដ្ឋជនអនឡាញចំនួន១៧អគារបន្ថែមទៀតនៅតំបន់សេដ្ឋកិច្ចពិសេស KK Park។

ក្នុងប្រតិបត្តិការនោះផងដែរ កងទ័ពបានចាប់ខ្លួនជនបរទេសចំនួន៥១៦នាក់ ដែលមានជនជាតិចិនច្រើនជាងគេ ពោលគឺ២២៥នាក់ បន្ទាប់មកគឺ វៀតណាម៨៣នាក់, ហ្វីលីពីន៧៧នាក់, កេនយ៉ា៣៩នាក់, អ៊ូហ្គង់ដា២០នាក់, នេប៉ាល់១៧នាក់, ឥណ្ឌូណេស៊ី១២នាក់, អេត្យូពី១១នាក់, ថៃ១០នាក់, ម៉ាឡេស៊ី៩នាក់, ឥណ្ឌា៤នាក់, សេរ៉ាឡេអូន៣នាក់, តៃវ៉ាន់២នាក់, ហ្គីណេអេក្វាទ័រ២នាក់, ម៉ាដាហ្គាស្កាម្នាក់ និងតូហ្គោម្នាក់។

ក្រៅពីកម្ទេចអគារនិងចាប់ខ្លួនជនបរទេសហើយនោះ កងទ័ពក៏បានចូលឆែកឆេរអគារ ហើយរឹបអូសសម្ភារៈនិងគ្រឿងអេឡិចត្រូនិច រួចដុតបំផ្លាញចោលផងដែរ។

អត្ថបទ៖ សុខ សុវណ្ណ