អានុទីនបដិសេធការចោទប្រកាន់ថារំលាយសភាដើម្បីគេចវេះពីញត្តិដកសេចក្ដីទុកចិត្ត

ភ្នំពេញ – លោក អានុទីន ឆានវីរៈគុល នាយករដ្ឋមន្ត្រីថៃ បានបដិសេធយ៉ាងច្បាស់លាស់នូវការចោទប្រកាន់ថា ការសម្រេចចិត្តរំលាយសភាតំណាងរាស្ត្ររបស់លោកគឺដើម្បីគេចវេះពីញត្តិដកសេចក្ដីទុកចិត្ត។

ក្នុងកម្មវិធីអនឡាញមួយកាលពីថ្ងៃចន្ទទី១៥ធ្នូ លោកបានអះអាងថា ការសម្រេចចិត្តនេះត្រូវបានធ្វើឡើងបន្ទាប់ពីគណបក្សប្រជាជនដែលជាបក្សប្រឆាំងបានអំពាវនាវជាសាធារណៈឲ្យរំលាយសភា។

លោកអានុទីនបានបញ្ជាក់ថា៖ “គ្មានញត្តិដកសេចក្ដីទុកចិត្តជាផ្លូវការណាមួយត្រូវបានដាក់ចេញនៅពេលខ្ញុំស្នើព្រះមហាក្សត្ររំលាយសភាឡើយ។ ខ្ញុំបានបញ្ជូនសេចក្តីព្រាងព្រះរាជក្រឹត្យដើម្បីរំលាយសភានៅប្រហែលម៉ោង១០យប់ នៅថ្ងៃដែលគណបក្សប្រជាជនបានធ្វើការទាមទារជាសាធារណៈ។”

លោក Natthaphong Rueangpanyawut មេដឹកនាំគណបក្សប្រជាជន ដែលពីមុនហៅថាគណបក្សឆ្ពោះទៅមុខ បានគ្រោងនឹងដាក់ញត្តិដកសេចក្ដីទុកចិត្តប្រឆាំងនឹងលោកអានុទីន បន្ទាប់ពីចោទប្រកាន់គណបក្សរបស់លោកថាបានបំពានកិច្ចព្រមព្រៀងពីមុនលើវិសោធនកម្មរដ្ឋធម្មនុញ្ញ។

លោកអានុទីនក៏បានបដិសេធការចោទប្រកាន់ថាលោកបានក្បត់គណបក្សប្រជាជន ឬបានប្រើឥទ្ធិពលលើសមាជិកព្រឹទ្ធសភា ដោយប្រាប់ថា ការប៉ុនប៉ងធ្វើបែបនោះនឹងធ្វើឲ្យលោកប្រឈមនឹងការចោទប្រកាន់ពីបទសមគំនិត។

ក្នុងនាមជាមេដឹកនាំរដ្ឋាភិបាលសំឡេងភាគតិច លោកអានុទីនបានប្រកាសថា ការបោះឆ្នោតដកសេចក្ដីទុកចិត្តនឹងធ្វើឲ្យរដ្ឋបាលដួលរលំភ្លាមៗ ដោយទុកឲ្យប្រទេសថៃគ្មានអំណាចប្រតិបត្តិក្នុងអំឡុងពេលមានការព្រួយបារម្ភផ្នែកសន្តិសុខកើនឡើង។

សូមជម្រាបថា ស្តេច Maha Vajiralongkorn ចេញព្រះរាជក្រឹត្យ អនុម័តការរំលាយសភា កាលពីថ្ងៃសុក្រទី១២ខែធ្នូ។ ប្រទេសថៃនឹងរៀបចំការបោះឆ្នោតនៅថ្ងៃទី៨ខែកុម្ភៈឆ្នាំ២០២៦ ដោយមានលោកអានុទីននឹងដឹកនាំរដ្ឋបាលបណ្តោះអាសន្នរហូតដល់រដ្ឋាភិបាលថ្មីត្រូវបានបង្កើតឡើង៕