By ភ្នំពេញ៖ សម្តេចកិត្តិសង្គហបណ្ឌិត ម៉ែន សំអន បានអំពាវនាវឱ្យថ្នាក់ដឹកនាំស្ត្រីទាំងអស់ប្រែក្លាយទិវានារីអន្តរជាតិ៨មីនា ពីថ្ងៃរីករាយដើរលេងកម្សាន្ត ទៅជាថ្ងៃចុះជួបសួរសុខទុក្ខដល់បងប្អូនជនភៀសសឹក និងអ្នករបួសនៅតាមមន្ទីរពេទ្យខេត្តជួរមុខ។
សម្តេចកិត្តិសង្គហបណ្ឌិត ម៉ែន សំអន ដែលជាឧត្តមប្រឹក្សាផ្ទាល់ព្រះមហាក្សត្រ និងប្រធានសមាគមនារីកម្ពុជាដើម្បីសន្តិភាព និងអភិវឌ្ឍន៍ បានធ្វើការអំពាវនាវនេះក្នុងពិធីអបអរសាទរទិវានារីអន្តរជាតិ៨មីនា ខួបលើកទី១១៥ នៅថ្ងៃទី០៤មីនា២០២៦។
ក្រោមប្រធានបទ “សន្តិភាព និងសន្តិសុខសម្រាប់ស្ត្រី និងគ្រួសារ” សម្តេចបានរំលេចពីសារៈសំខាន់នៃសន្តិភាពសម្រាប់ស្ត្រី និងការរួមចំណែកសកម្មរបស់ស្ត្រីក្នុងការកសាងសន្តិភាព។
សម្តេចបានអំពាវនាវឱ្យមានកិច្ចអន្តរាគមន៍ជាបន្ទាន់ក្នុងការការពារ និងលុបបំបាត់ឧបសគ្គរារាំងដែលមានផលប៉ះពាល់អវិជ្ជមានដល់ស្ត្រី និងគ្រួសារ។
ក្នុងពិធីនោះផងដែរ សម្តេចបានចូលរួមអបអរសាទរចំពោះលោកស្រី ចម ក្រស្នា ដែលត្រូវបានតែងតាំងជាប្រធានកិត្តិយសគណៈកម្មការសាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ ក្រសួងអធិការកិច្ច។
លោក សុខ សូកេន រដ្ឋមន្ត្រីក្រសួងអធិការកិច្ច បានអះអាងថា ក្រសួងនឹងបន្តគាំទ្រសកម្មភាពស្ត្រីស្របតាមយុទ្ធសាស្ត្របញ្ចកោណដំណាក់កាលទី១របស់រាជរដ្ឋាភិបាល។
ទិវានារីអន្តរជាតិ៨មីនា ត្រូវបានប្រារព្ធពិធីជារៀងរាល់ឆ្នាំ ដើម្បីរំឭកពីការតស៊ូទាមទារសិទ្ធិស្ត្រី និងឆ្លុះបញ្ចាំងអំពីវឌ្ឍនភាពក្នុងការលើកកម្ពស់សមភាពយេនឌ័រ។
សម្តេចក៏បានផ្តាំផ្ញើសាកសួរសុខទុក្ខពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកិត្តិយសសមាគមនារីកម្ពុជា ដើម្បីសន្តិភាព និងអភិវឌ្ឍន៍ ជូនដល់សមាជិកទាំងអស់។
សម្តេចបានស្នើឱ្យសមាជិកសមាគមនារីទាំងអស់ចូលរួមក្នុងសកម្មភាពជួយសង្គ្រោះជនភៀសសឹក និងអ្នករបួស ដោយប្រែក្លាយទិវានារីអន្តរជាតិឱ្យក្លាយជាថ្ងៃផ្តល់ការគាំទ្រដល់អ្នកដែលត្រូវការជំនួយ។
ពិធីនេះក៏បានប្រកាសការកែសម្រួល និងបំពេញបន្ថែមសមាសភាពគណៈកម្មការសាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ ក្រសួងអធិការកិច្ច ដើម្បីពង្រឹងសកម្មភាពស្ត្រីក្នុងការរួមចំណែកដល់ការអភិវឌ្ឍប្រកបដោយចីរភាព។
