អ៊ីរ៉ង់វាយប្រហារអាកាសយានដ្ឋាន និងបិទច្រកសមុទ្រ ដើម្បីដាក់សម្ពាធលើអាមេរិក

អ៊ីរ៉ង់បានចាប់ផ្ដើមយុទ្ធសាស្ត្រវាយប្រហារលើអាកាសយានដ្ឋានសំខាន់ៗនៅតំបន់ឈូងសមុទ្រពែក្សរ៍ ដោយធ្វើឱ្យប្រតិបត្តិការអាកាសចរណ៍ក្នុងតំបន់ជាប់គាំងយ៉ាងធ្ងន់ធ្ងរ។ ប្រទេសទាំងនេះពឹងផ្អែកខ្លាំងលើអាកាសយានដ្ឋានសម្រាប់ការនាំចូលអាហារ និងកម្លាំងពលកម្មបរទេស។

តាមរបាយការណ៍ពី Reuters និង Flightradar24 ជើងហោះហើរជាង ៣,៤០០ ត្រូវបានលុបចោលភ្លាមៗនៅថ្ងៃទី១ មីនា នៅអាកាសយានដ្ឋាន៧កន្លែងនៅមជ្ឈិមបូព៌ា។ រហូតដល់ថ្ងៃទី៣ មីនា តួលេខនេះឈានដល់ជិត១ម៉ឺន។

អ៊ីរ៉ង់បានវាយប្រហារអាកាសយានដ្ឋាននៅឌូបៃ អាប៊ូដាប៊ី គុយវ៉ែត និងបារ៉ែន។ កាលពីព្រឹកថ្ងៃទី១ មីនា បន្ទាប់ពីការវាយប្រហារដោយយន្តហោះគ្មានមនុស្សបើកលើអាកាសយានដ្ឋានអន្តរជាតិឌូបៃ ជើងហោះហើរទាំងអស់ត្រូវបានផ្អាក។

មិនត្រឹមតែប៉ុណ្ណោះ អ៊ីរ៉ង់ក៏បានរារាំងច្រកសមុទ្រហ័រមូស ដែលជាច្រកសមុទ្រសំខាន់សម្រាប់នាំចេញប្រេងទៅកាន់ពិភពលោក។ យន្តហោះគ្មានមនុស្សបើកក៏បានវាយប្រហារសណ្ឋាគារ និងអគារនៅឌូបៃ និងបារ៉ែនផងដែរ។

យុទ្ធសាស្ត្រនេះមានគោលបំណងបង្កើនសម្ពាធលើសហរដ្ឋអាមេរិក ដោយបង្ខំឱ្យប្រទេសឈូងសមុទ្រអំពាវនាវអាមេរិកបញ្ឈប់ការវាយប្រហារ។ ការវាយប្រហារទាំងនេះបានធ្វើឱ្យតម្លៃប្រេងឡើងថ្លៃ បង្កើនការព្រួយបារម្ភអំពីអតិផរណា។

អ្នកវិភាគសន្តិសុខបានលើកឡើងថា យុទ្ធសាស្ត្ររបស់អ៊ីរ៉ង់កំពុងធ្វើឱ្យជម្លោះនេះក្លាយជាវិបត្តិអន្តរជាតិ ដោយទាញបណ្ដាប្រទេសឈូងសមុទ្រឱ្យពាក់ព័ន្ធតាំងពីដើម។