សហរដ្ឋអាមេរិកប្រមូលកម្លាំងយោធាដ៏ធំប្រឆាំងអ៊ីរ៉ង់ ដោយមានកងទ័ព៥ម៉ឺននាក់ និងយន្តហោះចម្បាំង២០០គ្រឿង

អន្តរជាតិ ៖ មេបញ្ជាការនៃទីបញ្ជាការកណ្តាលសហរដ្ឋអាមេរិក លោក Brad Cooper បានបង្ហោះព័ត៌មានថ្មីៗអំពីប្រតិបត្តិការយោធានៅក្នុងប្រទេសអ៊ីរ៉ង់ តាមរយៈសារនៅលើបណ្តាញសង្គម X។ លោកបានបង្ហាញថា បេសកកម្មនេះមានការចូលរួមពីកងទ័ពជាង៥ម៉ឺននាក់ យន្តហោះចម្បាំង២០០គ្រឿង នាវាផ្ទុកយន្តហោះ២គ្រឿង និងយន្តហោះទម្លាក់គ្រាប់បែក។

នេះតំណាងឱ្យការប្រមូលផ្តុំកម្លាំងដ៏ធំរបស់អាមេរិកនៅតំបន់មជ្ឈិមបូព៌ា។ លោកនិយាយថា សហរដ្ឋអាមេរិកបានវាយប្រហារគោលដៅជិត២,០០០កន្លែង នៅក្នុងប្រទេសអ៊ីរ៉ង់ និងបានបំផ្លាញនាវាអ៊ីរ៉ង់ចំនួន១៧គ្រឿង។

លោកបានបន្ថែមថា «យើងបានធ្វើឱ្យខូចប្រព័ន្ធការពារដែនអាកាសរបស់អ៊ីរ៉ង់យ៉ាងធ្ងន់ធ្ងរ និងបានបំផ្លាញមីស៊ីលបាលីស្ទិក ជើងទម្រសម្រាប់បាញ់ និងយន្តហោះ drones គ្មានមនុស្សបើករាប់រយគ្រឿងរបស់អ៊ីរ៉ង់»។

នៅក្នុងការសងសឹក មេបញ្ជាការអាមេរិករូបនេះបាននិយាយថា អ៊ីរ៉ង់បានបាញ់មីស៊ីលបាលីស្ទិកជាង ៥០០គ្រាប់ និងយន្តហោះគ្មានមនុស្សបើកចំនួន២,០០០គ្រឿង។ លោកបានបន្ថែមថា អ៊ីរ៉ង់បានកំណត់គោលដៅលើជនស៊ីវិលដោយមិនរើសមុខ។ នេះបើតាមការចុះផ្សាយដោយសារព័ត៌មាន BBC ៕ (VAYO)