កម្ពុជាចូលជាសមាជិកអង្គការអន្តរជាតិត្រួតពិនិត្យសោធននិវត្តន៍ ជាមួយសមាជិកជាង៧០ប្រទេស

ទីក្រុងប៉ារីស – បេឡាជាតិសន្តិសុខសង្គម (ប.ស.ស.) របស់ក្រសួងការងារ និងបណ្តុះបណ្តាលវិជ្ជាជីវៈ បានទទួលសមាជិកភាពជាផ្លូវការក្នុងអង្គការអន្តរជាតិសម្រាប់ស្ថាប័នត្រួតពិនិត្យសោធននិវត្តន៍ (IOPS) នាថ្ងៃទី៣ មីនា ២០២៦។ នេះជាជំហានថ្មីមួយក្នុងការពង្រឹងប្រព័ន្ធសន្តិសុខសង្គមរបស់កម្ពុជា។

លោក គួច សុមាន រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ ដែលដឹកនាំគណៈប្រតិភូកម្ពុជា បានបង្ហាញថា ការចូលជាសមាជិកនេះបង្ហាញពីការប្តេជ្ញាចិត្តរបស់រដ្ឋាភិបាលកម្ពុជាក្នុងការអភិវឌ្ឍប្រព័ន្ធសន្តិសុខសង្គមឱ្យមានប្រសិទ្ធភាពជាងមុន។

កិច្ចប្រជុំរួមគ្នារវាងក្រុមការងារ WPIP និងអង្គការ IOPS បានរៀបចំឡើងក្នុងព្រឹត្តិការណ៍សប្តាហ៍ទីផ្សារហិរញ្ញវត្ថុរបស់អង្គការ OECD នៅទីស្នាក់ការកណ្តាលនៅប៉ារីស។ កិច្ចប្រជុំនេះមានការចូលរួមពីតំណាងស្ថាប័នជាសមាជិកមកពីជាង៧០ប្រទេស និងប្រតិភូសរុបប្រមាណ៣០០នាក់។

ក្នុងកិច្ចប្រជុំ អង្គប្រជុំបានពិភាក្សាយ៉ាងស៊ីជម្រៅលើការរៀបចំគោលនយោបាយ និងបទប្បញ្ញត្តិពាក់ព័ន្ធនឹងប្រាក់សោធនផ្អែកលើទ្រព្យសកម្ម ការធ្វើបច្ចុប្បន្នភាពលើការសិក្សាស្រាវជ្រាវ និងការចែករំលែកបទពិសោធន៍ក្នុងការអនុវត្តរបបភាគទានសន្តិសុខសង្គម។

លោករដ្ឋលេខាធិការបានពន្យល់ថា សមាជិកភាពនេះនឹងជួយកម្ពុជាឱ្យសិក្សាពីបទពិសោធន៍របស់ប្រទេសផ្សេងៗក្នុងការគ្រប់គ្រងមូលនិធិសន្តិសុខសង្គម ការផ្តល់អត្ថប្រយោជន៍ដល់សមាជិក និងការអនុវត្តរបបសន្តិសុខសង្គមផ្នែកប្រាក់សោធនឱ្យមានប្រសិទ្ធភាព។

អង្គប្រជុំក៏បានពិនិត្យលើផែនការសម្រាប់ព្រឹត្តិការណ៍នាពេលអនាគតរបស់សមាជិក IOPS និង OECD ដើម្បីបន្តជំរុញវិស័យសន្តិសុខសង្គមឱ្យកាន់តែមានការរីកចម្រើន។

ដោយ៖ តារា