វៀតណាមចេញសម្តីរឹងមុខប្រឆាំងការវាយប្រហាររបស់អាមេរិក-អ៊ីស្រាអែលលើអ៊ីរ៉ង់

ភ្នំពេញ – អ្នកនាំពាក្យក្រសួងការបរទេសវៀតណាម លោកស្រី Pham Thu Hang បានបញ្ជាក់ជំហររឹងមុខថ្មីរបស់វៀតណាមក្នុងការប្រឆាំងនឹងការវាយប្រហាររបស់អាមេរិក និងអ៊ីស្រាអែលលើអ៊ីរ៉ង់។

ការបញ្ជាក់នេះបានធ្វើឡើងនៅថ្ងៃទី៣ ខែមីនា ឆ្នាំ២០២៦ នៅពេលដែលភាពតានតឹងនៅតំបន់មជ្ឈិមបូព៌ាកំពុងកើនឡើង។ លោកស្រីបានលើកឡើងថា វៀតណាមប្រឆាំងនឹងការប្រើប្រាស់កម្លាំងដើម្បីវាយប្រហារប្រទេសអធិបតេយ្យ ជាពិសេសការវាយប្រហារលើហេដ្ឋារចនាសម្ព័ន្ធស៊ីវិលដែលបណ្តាលឲ្យបាត់បង់ជីវិត។

“សកម្មភាពវាយប្រហារទាំងនេះបានបង្កការខូចខាតយ៉ាងធ្ងន់ធ្ងរ និងបន្តគំរាមកំហែងដល់អាយុជីវិត សុវត្ថិភាព និងផលប្រយោជន៍របស់ជនស៊ីវិល រួមទាំងពលរដ្ឋវៀតណាមនៅក្នុងតំបន់” លោកស្រីបានអះអាង។

លោកស្រីបានពន្យល់បន្ថែមថា ផលប៉ះពាល់ពីការវាយប្រហារទាំងនេះបានធ្វើឲ្យមានអស្ថិរភាពផ្នែកសេដ្ឋកិច្ច និងប៉ះពាល់ដល់សន្តិភាព ព្រមទាំងស្ថិរភាពទាំងក្នុងតំបន់ និងទូទាំងពិភពលោក។

វៀតណាមក៏បានអំពាវនាវដល់គ្រប់ភាគីពាក់ព័ន្ធទាំងអស់ឲ្យធ្វើសកម្មភាពដោយមានការទទួលខុសត្រូវ គោរពយ៉ាងតឹងរ៉ឹងនូវច្បាប់អន្តរជាតិ ធម្មនុញ្ញអង្គការសហប្រជាជាតិ និងសេចក្តីសម្រេចផ្សេងៗរបស់អង្គការសហប្រជាជាតិ។

ជំហរនេះត្រូវបានបញ្ជាក់ជាថ្មីបន្ទាប់ពីត្រូវបានប្រកាសរួចមកហើយនៅថ្ងៃទី២៨ ខែកុម្ភៈ ឆ្នាំ២០២៦។