By ភ្នំពេញ៖ យុវជនម្នាក់បានរងរបួសធ្ងន់បន្ទាប់ពីបើកបរម៉ូតូក្នុងល្បឿនលឿន ដួលអូសបែកផ្កាភ្លើង ហើយបុកជាមួយរថយន្តដែលកំពុងបើកបរបញ្ច្រាសទិសដៅនៅតាមផ្លូវភ្នំពេញ-ហាណូយ។
គ្រោះថ្នាក់ចរាចរណ៍ដ៏ធ្ងន់ធ្ងរនេះបានកើតឡើងនៅយប់ថ្ងៃទី៤ ខែមីនា ឆ្នាំ២០២៦ នៅតាមបណ្ដោយផ្លូវភ្នំពេញ-ហាណូយ កែងនឹងផ្លូវរថភ្លើង ក្នុងសង្កាត់គោកឃ្លាង ខណ្ឌសែនសុខ រាជធានីភ្នំពេញ។
ប្រភពពីកន្លែងកើតហេតុបានឱ្យដឹងថា យុវជនដែលបើកបរម៉ូតូម៉ាកហុងដា ឌ្រីមសេ ១២៥ ពាក់ស្លាកលេខភ្នំពេញ 1LI 0199 បានជិះក្នុងល្បឿនលឿនពីទិសខាងត្បូងទៅខាងជើង។ នៅពេលដល់ចំណុចកើតហេតុ អ្នកបើកបរបានចាប់ហ្វ្រាំងបង្ខំ បណ្ដាលឱ្យដួលអូសបែកផ្កាភ្លើង ហើយបុកជាមួយរថយន្តម៉ាកកូរ៉ូឡា សេរីទំនើប ឆ្នាំ២០២៥ ពាក់ស្លាកលេខភ្នំពេញ 2CB 1899 ដែលកំពុងបើកបរពីទិសខាងជើងទៅត្បូង។
ជនរងគ្រោះដែលជាអ្នកបើកបរម៉ូតូបានរងរបួសធ្ងន់ ហើយត្រូវបានរថយន្តសាម៊ុយដឹកទៅសង្គ្រោះនៅមន្ទីរពេទ្យ។ រថយន្តទាំងពីរបានរងការខូចខាតយ៉ាងធ្ងន់ធ្ងរ។
ក្រោយកើតហេតុ សមត្ថកិច្ចមូលដ្ឋានបានចុះមកដល់កន្លែង ហើយបានទំនាក់ទំនងទៅសមត្ថកិច្ចជំនាញដើម្បីធ្វើការវាស់វែង។ យានយន្តទាំងពីរត្រូវបានយកទៅអែបកៀនដើម្បីឱ្យភាគីទាំងពីរធ្វើការសម្របសម្រួលគ្នាតាមផ្លូវច្បាប់។
សូមអំពាវនាវដល់ប្រជាពលរដ្ឋទាំងអស់ឱ្យប្រុងប្រយ័ត្ន និងគោរពច្បាប់ចរាចរណ៍ ជៀសវាងការបើកបរលឿនលើសលែក ដើម្បីកាត់បន្ថយគ្រោះថ្នាក់ចរាចរណ៍ដែលអាចកើតមាន។
