By ទីក្រុងសេអ៊ូល៖ មេដឹកនាំកូរ៉េខាងជើង លោក គីម ជុងអ៊ុន បានចុះត្រួតពិនិត្យការធ្វើតេស្ដនាវាពិឃាដ និងការបាញ់មីស៊ីលគ្រូស ក្នុងសប្ដាហ៍នេះ ដោយបញ្ជាក់ថា ការបំពាក់អាវុធនុយក្លេអ៊ែរឱ្យកងទ័ពជើងទឹកកំពុងរីកចម្រើនយ៉ាងគួរឱ្យកត់សម្គាល់។
ប្រព័ន្ធផ្សព្វផ្សាយរដ្ឋកូរ៉េខាងជើង KCNA បានរាយការណ៍ថា ការធ្វើតេស្ដនេះកើតឡើងបន្ទាប់ពីលោក គីម ជុងអ៊ុន ដឹកនាំមហាសន្និបាតគណបក្សពលករ៥ឆ្នាំម្ដង ដែលលោកបានប្រកាសជាថ្មីពីគោលដៅពង្រឹងសមត្ថភាពការពារជាតិ។
ការធ្វើតេស្ដនេះមានភាពសំខាន់ជាពិសេស នៅពេលដែលសហរដ្ឋអាមេរិក និងអ៉ីស្រាអែល កំពុងពួតដៃគ្នាបើកការវាយប្រហារលើអ៉ីរ៉ង់ ដើម្បីកម្ទេចកម្មវិធីនុយក្លេអ៊ែរ និងមីស៊ីលរបស់អ៉ីរ៉ង់។
តាមការបញ្ជាក់របស់ KCNA លោក គីម ជុងអ៊ុន បានចុះត្រួតពិនិត្យនាវាពិឃាដ Choe Hyon កាលពីថ្ងៃអង្គារកន្លងទៅ។ នាវាពិឃាដនេះមានទម្ងន់ ៥០០០តោន ហើយជានាវាពិឃាដមួយក្នុងចំណោមនាវាពិឃាដ២គ្រឿងរបស់កូរ៉េខាងជើង ដោយនាវាពិឃាដទី៣កំពុងស្ថិតនៅក្រោមការសាងសង់។
លោក គីម បានសង្កត់ធ្ងន់ថា៖ «ការបំពាក់អាវុធនុយក្លេអ៊ែរឱ្យកងទ័ពជើងទឹក កំពុងស្ថិតក្នុងដំណើរការរីកចម្រើនគួរឱ្យកត់សម្គាល់»។ ការអះអាងនេះបានធ្វើឡើងនៅពេលដែលតំបន់ពិភពលោកកំពុងជួបប្រទះនឹងភាពតានតឹងយោធាកើនឡើង។
