By ខេត្តស្ទឹងត្រែង – លោកសាស្ត្រាចារ្យជំនួយវេជ្ជបណ្ឌិត តាត សុវណ្ណ នាយកសាលាមធ្យមសិក្សាសុខាភិបាលភូមិភាគស្ទឹងត្រែង បានថ្លែងអំណរគុណដល់ស្ត្រីទាំងអស់ដែលបានរួមចំណែកថែរក្សាសន្តិសុខ សន្តិភាព និងអភិវឌ្ឍន៍សង្គមនៅក្នុងខេត្ត។
ក្នុងឱកាសចូលរួមពិធីអបអរសាទរខួបលើកទី១១៥ នៃទិវាអន្តរជាតិនារី ៨មីនា ឆ្នាំ២០២៦ ក្រោមប្រធានបទ «សន្តិភាព និងសន្តិសុខសម្រាប់ស្ត្រី និងគ្រួសារ» នៅថ្ងៃទី៣ ខែមីនា ឆ្នាំ២០២៦ លោកសាស្ត្រាចារ្យជំនួយវេជ្ជបណ្ឌិត តាត សុវណ្ណ បានផ្ដាំផ្ញើការកោតសរសើរ និងលើកទឹកចិត្តពីសំណាក់ថ្នាក់ដឹកនាំទាំងថ្នាក់ជាតិ និងថ្នាក់ក្រោមជាតិ។
លោកបានជូនចំពោះមន្ត្រីរាជការ បុគ្គលិកសិក្សា និងនិស្សិតទាំងអស់ ជាពិសេសស្ត្រីដែលបានចូលរួមចំណែកក្នុងការរក្សាសន្តិសុខ សន្តិភាព និងអភិវឌ្ឍន៍គ្រួសាររឹងមាំ។ លោកបានថ្លែងបញ្ជាក់ពីសារៈសំខាន់មិនអាចកាត់ថ្លៃបាននៃសន្តិភាព និងសន្តិសុខសម្រាប់ស្ត្រី និងក្រុមគ្រួសារ។
«សន្តិភាព និងសន្តិសុខគឺជាបុរេលក្ខខណ្ឌចម្បងដែលធ្វើឱ្យស្ត្រី និងក្រុមគ្រួសារអាចរស់នៅដោយសុភមង្គល សុខដុមរមនា និងសុខុមាលភាពទាំងផ្លូវកាយ និងផ្លូវចិត្ត» លោកសាស្ត្រាចារ្យជំនួយ តាត សុវណ្ណ បានថ្លែង។
លោកបានជំរុញឱ្យស្ត្រីទាំងអស់រួមចំណែកយ៉ាងសកម្មក្នុងការខិតខំប្រឹងប្រែងដើម្បីកសាង និងថែរក្សាសន្តិភាព ដែលជាធាតុផ្សំមិនអាចខ្វះបានសម្រាប់ការអភិវឌ្ឍប្រកបដោយចីរភាព ស្ថិរភាព និងវិបុលភាពសង្គម។
ពិធីនេះបានប្រព្រឹត្តិទៅក្នុងបរិយាកាសពោរពេញដោយក្តីសោមនស្សរីករាយ និងការយល់ដឹងពីសារៈសំខាន់នៃតួនាទីស្ត្រីក្នុងការរក្សាសន្តិភាព និងអភិវឌ្ឍន៍សង្គម។
ដោយ៖ តារា
