By 
កងឆ្មាំបដិវត្តន៍អ៊ីរ៉ង់ (IRGC) បានប្រកាសថា ពួកគេបានគ្រប់គ្រងច្រកសមុទ្រ Hormuz ទាំងស្រុង ក្នុងពេលដែលប្រធានាធិបតីសហរដ្ឋអាមេរិកលោក ដូណាល់ ត្រាំ បានព្រមានថា ត្រៀមខ្លួនរួចជាស្រេចក្នុងការពង្រាយកងទ័ពជើងទឹកអមដំណើរនាវាដឹកប្រេង។
លោក Mohammad Akbarzadeh មន្ត្រីកងទ័ពជើងទឹក IRGC បានប្រកាសកាលពីថ្ងៃពុធ តាមរយៈទីភ្នាក់ងារសារព័ត៌មាន Fars ថា៖ «បច្ចុប្បន្នច្រកសមុទ្រ Hormuz ស្ថិតក្រោមការគ្រប់គ្រងទាំងស្រុងរបស់កងទ័ពជើងទឹកសាធារណរដ្ឋអ៊ីរ៉ង់»។
ច្រកសមុទ្រ Hormuz ជាផ្លូវនាវាចរណ៍ដឹកប្រេងសំខាន់ប្រហែលមួយភាគប្រាំនៃប្រេងពិភពលោក ដែលត្រូវបានដឹកជញ្ជូនទៅកាន់ប្រទេសចម្រាញ់ប្រេងដូចជាចិន ជប៉ុន និងប្រទេសផ្សេងៗទៀត។
ទោះជាយ៉ាងណា របាយការណ៍ពីទីភ្នាក់ងារសារព័ត៌មានរ៉យទ័របានលើកឡើងថា នាវាដឹកប្រេងមួយគ្រឿងឈ្មោះ Pola បានធ្វើដំណើរឆ្លងកាត់ច្រកសមុទ្រនេះដោយបិទឧបករណ៍តាមដាន AIS របស់ខ្លួន។ នាវានេះបានធ្វើដំណើរទៅកាន់កំពង់ផែអេមីរ៉ាតអារ៉ាប់រួម ដើម្បីផ្ទុកប្រេងឆៅ។
សង្គ្រាមរវាងសហរដ្ឋអាមេរិក និងអ៊ីស្រាអែលលើអ៊ីរ៉ង់ កំពុងរំខានដល់ខ្សែសង្វាក់ផ្គត់ផ្គង់សកល ដោយការដឹកជញ្ជូនទំនិញត្រូវបានបិទនៅក្នុងច្រកសមុទ្រ Hormuz។
តាមរបាយការណ៍ពី Al Jazeera ក្រុម IRGC បាននិយាយថា៖ «វាមិនអាចទៅរួចទេសម្រាប់កប៉ាល់ណាមួយដែលឆ្លងកាត់នៅទីនេះ ចំណែកកប៉ាល់ដឹកប្រេងជាង ១០គ្រឿងត្រូវគ្រប់គ្រងដោយ IRGC»។
ក្រុមហ៊ុន Clarksons Research បានប៉ាន់ប្រមាណថា កប៉ាល់ប្រហែល ៣,២០០គ្រឿង ឬប្រហែល ៤ភាគរយនៃទម្ងន់កប៉ាល់សកលកំពុងចតក្នុងឈូងសមុទ្រ។ ចំណែកកប៉ាល់ប្រហែល ៥០០គ្រឿងកំពុងរង់ចាំនៅខាងក្រៅឈូងសមុទ្រ។
លោក ត្រាំ បានប្រកាសលើ Truth Social ថា៖ «មិនថាមានរឿងអ្វីកើតឡើងទេ សហរដ្ឋអាមេរិកនឹងធានាបាននូវលំហូរថាមពលសេរីទៅកាន់ពិភពលោក។ អំណាចសេដ្ឋកិច្ច និងយោធារបស់សហរដ្ឋអាមេរិកគឺអស្ចារ្យបំផុតនៅលើផែនដី»។
