By រាជធានីភ្នំពេញ៖ ក្រសួងអប់រំ យុវជន និងកីឡា បានចាប់ផ្តើមវគ្គបណ្តុះបណ្តាលជំនាញឌីជីថលដើម្បីពង្រឹងសមត្ថភាពក្នុងការស្រង់ទិន្នន័យ និងស្ថិតិកីឡា ដោយមានសិក្ខាកាមចូលរួមជិត ៨០នាក់។
ឯកឧត្តម វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា ដែលធ្វើជាអធិបតីក្នុងពិធីបើកវគ្គនេះ បានថ្លែងថា៖ “ការសិក្សាជំនាញឌីជីថលពិតជាចាំបាច់ និងជួយបង្កើនប្រសិទ្ធភាពការងារ ជាពិសេសក្នុងការអនុវត្តគោលនយោបាយរដ្ឋាភិបាលឌីជីថល។”
វគ្គបណ្តុះបណ្តាលដែលមានរយៈពេល៤ថ្ងៃនេះ ចាប់ពីថ្ងៃទី៣ ដល់ថ្ងៃទី៦ ខែមីនា ឆ្នាំ២០២៦ នឹងផ្តល់ចំណេះដឹងអំពីបច្ចេកវិទ្យាព័ត៌មានសម្រាប់ការប្រមូល និងវិភាគទិន្នន័យកីឡា។
ទន្ទឹមនឹងនេះ នាយកដ្ឋានរៀបចំព្រឹត្តិការណ៍ និងស្ថិតិកីឡា កំពុងរៀបចំយុទ្ធសាស្ត្រពង្រឹងសមត្ថភាពបច្ចេកវិទ្យាថ្មីៗ ដើម្បីត្រៀមលក្ខណៈសម្រាប់ការចូលរួមរៀបចំព្រឹត្តិការណ៍កីឡាសាកលវិទ្យាល័យអាស៊ានឆ្នាំ២០២៨ និងយុវជនអាស៊ីឆ្នាំ២០៣១។
“ការយល់ដឹងពីរបៀបប្រមូលផ្តុំ គ្រប់គ្រង និងបកស្រាយទិន្នន័យកីឡាបានក្លាយជាកត្តាចាំបាច់សម្រាប់អត្តពលិក គ្រូបង្វឹក អ្នកវិភាគ និងអង្គការកីឡា។” ឯកឧត្តមបានបន្ថែម។
ជារួម ការសិក្សាជំនាញឌីជីថលក្នុងវិស័យកីឡា នឹងជួយពង្រឹងសមត្ថភាពការសម្រេចចិត្តដែលជំរុញដោយទិន្នន័យ និងជំរុញប្រសិទ្ធភាពការងារក្នុងការរៀបចំព្រឹត្តិការណ៍កីឡាថ្នាក់អន្តរជាតិនាពេលខាងមុខ។
