ណាតូបាញ់ទម្លាក់មីស៊ីលបាលីស្ទិកអ៊ីរ៉ង់ដែលហោះចូលដែនអាកាសតួកគី

អង្គការណាតូបានបាញ់ទម្លាក់មីស៊ីលបាលីស្ទិកមួយគ្រាប់ដែលបាញ់ចេញពីអ៊ីរ៉ង់ ហើយហោះចូលទៅក្នុងដែនអាកាសតួកគី នៅថ្ងៃទី០៤ ខែមីនា ឆ្នាំ២០២៦។ មីស៊ីលនេះបានឆ្លងកាត់ដែនអាកាសស៊ីរី និងអ៊ីរ៉ាក់មុនពេលត្រូវបានបាញ់ទម្លាក់ដោយប្រព័ន្ធការពារផ្លូវអាកាសរបស់ណាតូ។

ក្រសួងការពារជាតិតួកគីបានបញ្ជាក់ថា៖ «គ្រាប់ផ្លោងមួយគ្រាប់ដែលបាញ់ចេញពីប្រទេសអ៊ីរ៉ង់ត្រូវបានរកឃើញថាឆ្លងកាត់ដែនអាកាសអ៊ីរ៉ាក់ និងស៊ីរី ហើយកំពុងឆ្ពោះទៅដែនអាកាសតួកគី។ វាត្រូវបានបាញ់ទម្លាក់ទាន់ពេលវេលាដោយប្រព័ន្ធការពារផ្លូវអាកាស និងមីស៊ីលរបស់អង្គការណាតូ»។

សេចក្តីថ្លែងការណ៍បន្តថា៖ «មិនមានអ្នកស្លាប់ ឬរបួសនោះទេ។ ទីក្រុងអង់ការ៉ារក្សាសិទ្ធិក្នុងការឆ្លើយតបទៅនឹងសកម្មភាពអរិភាពណាមួយប្រឆាំងនឹងតំបន់របស់ខ្លួន ខណៈព្រមានដល់ភាគីនានាឱ្យចៀសវាងការបង្កើនជម្លោះ»។

ប្រធានាធិបតីតួកគីលោក Recep Tayyip Erdogan បានថ្លែងក្នុងសុន្ទរកថាថា៖ «ប្រទេសនេះកំពុងចាត់វិធានការគ្រប់វិធីដែលចាំបាច់ ដោយពិគ្រោះយោបល់ជាមួយសម្ព័ន្ធមិត្តណាតូ ហើយកំពុងចេញការព្រមានក្នុងលក្ខខណ្ឌច្បាស់លាស់បំផុត ដើម្បីការពារឧប្បត្តិហេតុស្រដៀងគ្នានេះពីការកើតឡើងម្តងទៀត»។

រដ្ឋមន្ត្រីការបរទេសតួកគីលោក Hakan Fidan បានអំពាវនាវទៅកាន់អ៊ីរ៉ង់ឱ្យចៀសវាងការបង្កើនជម្លោះ ខណៈអ្នកនាំពាក្យណាតូលោកស្រី Allison Hart បានថ្កោលទោសការវាយប្រហាររបស់អ៊ីរ៉ង់លើប្រទេសតួកគី។ អ៊ីរ៉ង់មិនទាន់ធ្វើអត្ថាធិប្បាយលើហេតុការណ៍នេះនៅឡើយទេ។