By ព្រះសីហនុ៖ នាវាទេសចរណ៍ឈ្មោះ NORWEGIAN SUN សញ្ជាតិ BAHAMAS បានចូលចតនៅកំពង់ផែស្វយ័តក្រុងព្រះសីហនុ នៅវេលាម៉ោង១១:២០ព្រឹកថ្ងៃទី០៥ ខែមិនា ឆ្នាំ២០២៦ ដោយសុវត្ថិភាព។
នាវាខាងលើបានដឹកភ្ញៀវទេសចរណ៍ចម្រុះជាតិសាសន៍ចំនួន១,៨៣១នាក់ (ស្រី១,០០៤នាក់ មកពី៤៦សញ្ជាតិ) រួមជាមួយនាវិក៨៩១នាក់ (ស្រី២០១នាក់)។
មន្ត្រីនគរបាលអន្តោប្រវេសន៍ច្រកទ្វារកំពង់ផែស្វយ័តបានបញ្ជាក់ថា គោលបំណងនៃការចូលចតនេះគឺដើម្បីឱ្យភ្ញៀវទេសចរណ៍មកទស្សនាប្រទេសកម្ពុជារយៈពេលមួយថ្ងៃពេញ ដើម្បីស្វែងយល់ពីវប្បធម៌ ប្រពៃណី និងការអភិវឌ្ឍន៍របស់ព្រះរាជាណាចក្រកម្ពុជា។
ក្នុងឱកាសនេះ មន្ត្រីនគរបាលអន្តោប្រវេសន៍បានជួយសម្រួលក្នុងការធ្វើបែបបទលើប៉ាស្ព័របន្ថែម ដើម្បីសម្រួលដល់ការធ្វើដំណើរបន្តរបស់ភ្ញៀវ។ ភ្ញៀវទេសចរណ៍ក៏បានធ្វើដំណើរកំសាន្តនៅតាមតំបន់រមណីយដ្ឋានតាមឆ្នេរ និងទីអារាមនានានៅក្នុងក្រុងព្រះសីហនុ។
នាវាទេសចរណ៍ NORWEGIAN SUN មានបណ្តោយ២៥៨.៦០ម៉ែត្រ ទទឹង៣២.០០ម៉ែត្រ និងជំរៅទឹក៨.២០ម៉ែត្រ។ នាវាបានធ្វើដំណើរមកពីប្រទេសប្រ៊ុយណេ ហើយនឹងបន្តដំណើរទៅប្រទេសថៃនៅម៉ោង១៩:០០នាទីនៅថ្ងៃដដែល។
ក្នុងចំណោមភ្ញៀវទេសចរណ៍ អាមេរិកមានចំនួនច្រើនជាងគេ (១,០៧៥នាក់ ស្រី៥៩២នាក់) តាមដោយកាណាដា (២២៣នាក់ ស្រី១១៩នាក់)។
ការចូលចតនាវាទេសចរណ៍នេះបង្ហាញពីការអភិវឌ្ឍន៍វិស័យទេសចរណ៍នៅកម្ពុជា និងសក្តានុពលក្នុងការទាក់ទាញទេសចរណ៍អន្តរជាតិមកទស្សនាប្រទេសកម្ពុជា។
អត្ថបទសរសេរដោយ រស់ ភីណា | កែសម្រួលដោយ ធីតា
