By ភ្នំពេញ៖ លោក ឃួង ស្រេង អភិបាលរាជធានីភ្នំពេញ បានសង្កត់ធ្ងន់ថា បុរសគ្រប់រូបមិនត្រូវលើកកម្ពស់ស្ត្រីត្រឹមតែមួយថ្ងៃ (៨មីនា) ប៉ុណ្ណោះទេ តែត្រូវគោរព និងលើកកម្ពស់ស្ត្រីជារៀងរហូត និងជាប្រចាំ ព្រោះស្ត្រីជាឆ្អឹងខ្នងនៃសេដ្ឋកិច្ចជាតិ។
លោក ឃួង ស្រេង បានថ្លែងការណ៍នេះក្នុងពិធីសំណេះសំណាលខួបលើកទី១១៥ នៃទិវាអន្តរជាតិនារី ៨មីនា ឆ្នាំ២០២៦ ក្រោមប្រធានបទ “សន្តិភាព និងសន្តិសុខសម្រាប់ស្ត្រី និងគ្រួសារ” នៅរសៀលថ្ងៃទី៤ ខែមីនា ឆ្នាំ២០២៦។
លោកបានបញ្ជាក់ថា៖ “ស្ត្រីធ្វើគ្រប់បែបយ៉ាង ដើម្បីសង្គមជាតិ សង្គមគ្រួសារ និងបានប្តូរជីវិត ដើម្បីបង្កើតកូនក្នុងគ្រួសារមួយដ៏ល្អ។ សម្តេចអគ្គមហាសេនាបតីតេជោហ៊ុន សែន សម្តេចគតិព្រឹទ្ធបណ្ឌិតប៊ុន រ៉ានីហ៊ុនសែន និងសម្ដេចមហាបវរធិបតី ហ៊ុន ម៉ាណែត តែងតែយកអស់នូវកម្លាំងកាយ កម្លាំងចិត្ត ដើម្បីគាំទ្រ និងលើកកម្ពស់នារីកម្ពុជា។”
លោក ឃួង ស្រេង បានលើកឡើងពីតួនាទីសំខាន់របស់ស្ត្រីកម្ពុជាក្នុងសង្គ្រាមជាមួយថៃ ដោយស្ត្រីបានជួយទាំងនៅជួរមុខ និងជួរក្រោយ ផ្សព្វផ្សាយព័ត៌មានពិត និងជួយប្តីជាទាហានការពារទឹកដី។
“ស្ត្រីក្រៅពីលះបង់ប្តីទៅសមរភូមិមុខ ក៏បានជួយឧបត្ថម្ភដល់កងទ័ពជួរមុខ និងមើលថែទាំអប់រំកូនចៅនៅក្នុងគ្រួសារ។ បើគ្មានស្ត្រី បុរសពិតជាជួបការលំបាក។” លោកបានបន្ថែម។
លោកបានរំលឹកថា ខ្មែរយើងបានលើកកម្ពស់សិទ្ធិសេរីភាពដល់នារីតាំងពីសម័យបុព្វកាលមក តាមរយៈតួនាទីជាមេភូមិ មេទ័ព មេឃុំ និងមេស្រុក។ រាជរដ្ឋាភិបាលបានផ្តល់ឱកាសឱ្យនារីចូលរួមក្នុងសកម្មភាពសង្គមទាំងអស់។
ក្នុងឱកាសនេះ លោក ឃួង ស្រេង និងលោក ម៉ប់ សារិន ប្រធានក្រុមប្រឹក្សារាជធានីភ្នំពេញ បានផ្តល់អំណោយលើកទឹកចិត្តដល់នារីចំនួន២៦៦នាក់ ដែលជាអំណោយពីសម្ដេចមហាបវរធិបតី ហ៊ុន ម៉ាណែត និងលោកជំទាវ បណ្ឌិត ពេជ ចន្ទមុន្នី ហ៊ុន ម៉ាណែត។
ពិធីនេះបានប្រព្រឹត្តទៅក្រោមអធិបតីភាពលោក ម៉ប់ សារិន ប្រធានក្រុមប្រឹក្សារាជធានីភ្នំពេញ និងលោកជំទាវ។
