អតីតទាហានជើងទឹកអាមេរិករងរបួសបាក់ដៃក្នុងព្រឹទ្ធសភា ពេលតវ៉ាប្រឆាំងសង្រ្គាមអ៊ីរ៉ង់

អតីតទាហានជើងទឹកអាមេរិកម្នាក់បានរងរបួសបាក់ដៃក្នុងព្រឹទ្ធសភាអាមេរិក បន្ទាប់ពីការប៉ះទង្គិចជាមួយប៉ូលិស និងសមាជិកព្រឹទ្ធសភា ក្នុងពេលតវ៉ាប្រឆាំងសង្រ្គាមអ៊ីរ៉ង់។

យោងតាមសារព័ត៌មាន RT នៅថ្ងៃទី០៥ ខែមីនា ឆ្នាំ២០២៦ លោក Brian McGinnis ជាអតីតទាហានម៉ារីនជើងទឹក និងជាបេក្ខជនគណបក្សបៃតងពីរដ្ឋ North Carolina បានស្រែកតវ៉ាកណ្តាលសវនាការព្រឹទ្ធសភា ដែលកំពុងស្តាប់សក្ខីកម្មពីសមាជិកអគ្គសេនាធិការចម្រុះ។

នៅពេលមន្ត្រីប៉ូលិសបីនាក់ និងសមាជិកព្រឹទ្ធសភា លោក Tim Sheehy ព្យាយាមនាំលោក McGinnis ចេញពីបន្ទប់ លោកបានចាប់ទ្វារ ហើយស្រែកថា៖ «គ្មាននរណាម្នាក់ចង់ប្រយុទ្ធដើម្បីអ៊ីស្រាអែលទេ!»

វីដេអូពីហេតុការណ៍បង្ហាញថា ដៃស្តាំរបស់លោក McGinnis បានរងរបួសបាក់ ខណៈអ្នកឈរមើលម្នាក់ស្រែកថា៖ «ដៃរបស់គាត់ ដៃរបស់គាត់!»។ ក្រោយមក មានមនុស្សម្នាក់ទៀតបានសួរលោក McGinnis អំពីសុខភាពដៃរបស់គាត់ ដែលគាត់បានឆ្លើយថា៖ «ទេ! វាមិនអីទេ»។

លោក Sheehy សមាជិកគណបក្សសាធារណរដ្ឋពីរដ្ឋ Montana បាននិយាយថា៖ «ខ្ញុំឃើញប៉ូលិសកំពុងដោះស្រាយជាមួយអ្នកតវ៉ាដែលគ្មានស្មារតី ហើយបានសម្រេចចិត្តធ្វើអន្តរាគមន៍ ដើម្បីជួយបន្ធូរបន្ថយស្ថានការណ៍»។

ប៉ូលិស Capitol បានបញ្ជាក់ថា៖ «លោក McGinnis បានតស៊ូ និងប្រយុទ្ធប្រឆាំងនឹងការប៉ុនប៉ងរបស់មន្ត្រីរបស់យើង ដើម្បីដកគាត់ចេញពីបន្ទប់ដោយហិង្សា»។ លោក McGinnis ប្រឈមនឹងការចោទប្រកាន់ចំនួនបីពីបទវាយប្រហារមន្ត្រីប៉ូលិស ទប់ទល់នឹងការចាប់ខ្លួន ការប្រមូលផ្តុំគ្នា រារាំង និងបង្កបាតុកម្មខុសច្បាប់។