នាវាទេសចរណ៍ NORWEGIAN SUN ដឹកភ្ញៀវអន្តរជាតិជិត ២ពាន់នាក់ ចូលទស្សនាកម្ពុជារយៈពេល ១ថ្ងៃ

ភ្នំពេញ៖ នាវាទេសចរណ៍ដ៏ធំមួយឈ្មោះ NORWEGIAN SUN បានចូលមកចតនៅកំពង់ផែស្វយ័តក្រុងព្រះសីនុនៅព្រឹកថ្ងៃទី០៥ ខែមីនា ឆ្នាំ២០២៦នេះ ដោយដឹកភ្ញៀវទេសចរជិត ២ពាន់នាក់មកទស្សនាប្រទេសកម្ពុជា។

នាវាទេសចរណ៍នេះមានសញ្ជាតិ BAHAMAS មានបណ្ដោយប្រវែង ២៥៨,៦០ ម៉ែត្រ ទទឹង ៣២,០០ ម៉ែត្រ និងជម្រៅ ៨,២០ ម៉ែត្រ។ នាវាបានធ្វើដំណើរមកពីប្រទេសប្រ៊ុយណេ ហើយមានគោលបំណងទស្សនាកម្ពុជារយៈពេល ១ថ្ងៃ។

នាវាទេសចរណ៍នេះមាននាវិកសរុបចំនួន ៨៩១ នាក់ (ស្រី ២០១ នាក់) មាន ៤៦ សញ្ជាតិ។ ចំណែកភ្ញៀវទេសចរមានចំនួនសរុប ១,៨៣១ នាក់ (ស្រី ១,០០៤ នាក់) ក៏មាន ៤៦ សញ្ជាតិដែរ។

ភ្ញៀវទេសចរភាគច្រើនមកពីសហរដ្ឋអាមេរិកចំនួន ១,០៧៥ នាក់ និងកាណាដាចំនួន ២២៣ នាក់។ នាវាទេសចរណ៍នេះនឹងចាកចេញទៅប្រទេសថៃនៅម៉ោង ១៩:០០ នាទីនៅថ្ងៃដដែល។

ការមកដល់នាវាទេសចរណ៍នេះបង្ហាញពីការរីកចម្រើននៃវិស័យទេសចរណ៍កម្ពុជា និងការទាក់ទាញភ្ញៀវទេសចរអន្តរជាតិឱ្យមកទស្សនាប្រទេសយើង។

ដោយ៖ តារា