By ភ្នំពេញ៖ នាយកដ្ឋាននគរបាលព្រហ្មទណ្ឌ បានឃាត់ខ្លួនជនសង្ស័យចំនួន២នាក់ ដែលពាក់ព័ន្ធនឹងករណីលួចម៉ូតូ និងការប្រតាយប្រតប់ជាមួយសមត្ថកិច្ច នៅក្នុងរាជធានីភ្នំពេញ។
ការប្រតិបត្តិការនេះបានធ្វើឡើងក្រោមការដឹកនាំរបស់លោកឧត្តមសេនីយ៍ត្រី ប៊ុត វណ្ណារដ្ឋ និងលោកឧត្តមសេនីយ៍ត្រី ខេង ម៉េងឈាង នៅថ្ងៃទី៣ ខែមីនា ឆ្នាំ២០២៦ វេលាម៉ោង២១:៣៥នាទី នៅត្រង់ចំណុចក្រោមស្ពានស្ទឹងមានជ័យ។
ជនសង្ស័យទាំងពីរនាក់មានឈ្មោះ តឿ សុវណ្ណ ហៅទី (អាយុ២១ឆ្នាំ) និង កង សំណាង ហៅណាង (អាយុ៣៣ឆ្នាំ)។ ពួកគេពាក់ព័ន្ធនឹងករណីលួចម៉ូតូដែលបានកើតឡើងនៅថ្ងៃទី២ ខែមីនា ឆ្នាំ២០២៥ នៅតំបន់ខណ្ឌទួលគោក។
កម្លាំងសមត្ថកិច្ចបានដកហូតសម្ភារៈជាច្រើនរួមមាន៖ ម៉ូតូម៉ាកហុងដា សង់សេ១២៥ ពណ៌ខ្មៅ (បានប្រគល់ជូនជនរងគ្រោះវិញ), ឧបករណ៍ឆក់១ដើម និងស្លាកលេខភ្នំពេញ 1HY-0800។
បច្ចុប្បន្ន ជនសង្ស័យទាំងពីរត្រូវបាននាំទៅនាយកដ្ឋាននគរបាលព្រហ្មទណ្ឌ ដើម្បីធ្វើការសាកសួរ និងកសាងសំណុំរឿងតាមនីតិវិធីច្បាប់។
