ធនាគារជាតិចូលរួមជាមួយ IMF ពិភាក្សាស្ថិរភាពសេដ្ឋកិច្ច និងអត្រាប្តូរប្រាក់ឆ្នាំ២០២៥

ភ្នំពេញ៖ លោកស្រីបណ្ឌិត ជា សិរី ទេសាភិបាលធនាគារជាតិកម្ពុជា បានទទួលការជួបពិភាក្សាជាមួយក្រុមបេសកកម្មអន្តរជាតិពីមូលនិធិរូបិយវត្ថុអន្តរជាតិ (IMF) ដែលដឹកនាំដោយលោក Kenichiro Kashiwase នាថ្ងៃទី៥ ខែមីនា ឆ្នាំ២០២៦។

ក្នុងជំនួបនេះ លោកស្រីទេសាភិបាលបានចែករំលែកពីស្ថានភាពសេដ្ឋកិច្ចកម្ពុជាក្នុងឆ្នាំ២០២៥ ដោយសង្កត់ធ្ងន់លើការរក្សាបាននូវស្ថិរភាពអត្រាប្តូរប្រាក់ដ៏ល្អ និងកម្រិតអតិផរណាទាប។ លោកស្រីបានរៀបរាប់ថា កម្ពុជាបានរក្សាស្ថិរភាពសេដ្ឋកិច្ចបានល្អ ទោះបីមានបញ្ហាប្រឈមជាច្រើនក៏ដោយ។

លោកស្រីបានលើកឡើងពីវិធានការចាំបាច់ជាច្រើនដែលកំពុងត្រូវបានអនុវត្ត ដើម្បីដោះស្រាយបញ្ហាប្រឈមសំខាន់ៗ រួមមានផលប៉ះពាល់ពីជម្លោះព្រំដែន ការឆបោកតាមប្រព័ន្ធបច្ចេកវិទ្យា និងការធ្វើឱ្យប្រសើរឡើងនូវប្រព័ន្ធធនាគារតាមច្បាប់។

ចំណែកលោក Kenichiro Kashiwase បានបង្ហាញពីការគាំទ្ររបស់ IMF ចំពោះកម្ពុជា ជាពិសេសក្នុងការអភិវឌ្ឍវិស័យធនាគារ ការផ្តល់ជំនួយបច្ចេកទេស អាហារូបករណ៍ និងការបណ្តុះបណ្តាលសមត្ថភាពបុគ្គលិក។

បន្ទាប់ពីការជួបជាមួយលោកស្រីទេសាភិបាល ក្រុមបេសកកម្ម IMF បានបន្តពិភាក្សាថ្នាក់បច្ចេកទេសជាមួយថ្នាក់ដឹកនាំធនាគារជាតិកម្ពុជា លើបញ្ហាសេដ្ឋកិច្ច វិស័យធនាគារ និងទស្សនវិស័យអនាគត។

ជំនួបនេះបានបង្ហាញពីកិច្ចសហប្រតិបត្តិការដ៏សំខាន់រវាងកម្ពុជា និង IMF ក្នុងការពង្រឹងស្ថិរភាពសេដ្ឋកិច្ច និងប្រព័ន្ធហិរញ្ញវត្ថុជាតិ។

ដោយ៖ តារា