By ភ្នំពេញ៖ នាយកដ្ឋានប្រឆាំងបទល្មើសបច្ចេកវិទ្យា បានចាត់វិធានការបង្ក្រាបលើករណីលក់ឆ្នោតកោសអនឡាញខុសច្បាប់ នៅលើបណ្តាញសង្គមហ្វេសប៊ុក កាលពីថ្ងៃទី២ ខែមីនា ឆ្នាំ២០២៦។
ការប្រតិបត្តិការនេះធ្វើឡើងដោយសហការជាមួយស្នងការដ្ឋាននគរបាលខេត្តស្វាយរៀង ក្រោមការដឹកនាំរបស់អគ្គស្នងការនគរបាលជាតិ លោក ស ថេត។ សមត្ថកិច្ចបានឃាត់ខ្លួនជនសង្ស័យម្នាក់ ឈ្មោះ ក.ទ ដែលបានជួលគណនីធនាគារ ABA និងលេខទូរស័ព្ទរបស់ខ្លួន ឱ្យក្រុមជនល្មើស ដើម្បីប្រព្រឹត្តសកម្មភាពលក់ឆ្នោតកោសអនឡាញតាមរយៈទំព័រហ្វេសប៊ុក Win Scratch Asia 666។
បច្ចុប្បន្ន ជនសង្ស័យត្រូវបានបញ្ជូនទៅកាន់អយ្យការអមសាលាដំបូងរាជធានីភ្នំពេញ ដើម្បីបន្តនីតិវិធីតាមផ្លូវច្បាប់។ នាយកដ្ឋានបានដាស់តឿនព្រមានដល់សាធារណជន ឱ្យប្រុងប្រយ័ត្នក្នុងការជួល ឬខ្ចីគណនីធនាគារ និងលេខទូរស័ព្ទរបស់ខ្លួនឱ្យអ្នកដទៃ ដែលអាចនាំឱ្យក្លាយជាអ្នកចូលរួមក្នុងអំពើល្មើសច្បាប់។
ប្រភព៖ នាយកដ្ឋានប្រឆាំងបទល្មើសបច្ចេកវិទ្យា
