ណាតូអះអាងថា នឹងបន្តគាំទ្រអ៊ុយក្រែន ទោះបីជាជម្លោះមជ្ឈិមបូព៌ាកំពុងរីករាលដាល

អគ្គលេខាធិការអង្គការណាតូ លោក ម៉ាក រូតតេ (Mark Rutte) បានបញ្ជាក់ថា សមាជិកសម្ព័ន្ធមិត្តទាំងអស់នៅតែឯកភាពគ្នាក្នុងការស្វែងរកមធ្យោបាយបន្តគាំទ្រអ៊ុយក្រែនក្នុងសង្គ្រាមប្រឆាំងនឹងរុស្ស៊ី ទោះបីជាជម្លោះនៅមជ្ឈិមបូព៌ាកំពុងរីករាលដាលក៏ដោយ។

ក្នុងបទសម្ភាសន៍ជាមួយសារព័ត៌មាន Reuters នៅថ្ងៃព្រហស្បតិ៍ ថ្ងៃទី០៥ខែមីនា ឆ្នាំ២០២៦ លោក Rutte បានលើកឡើងពីលទ្ធភាពផ្តល់ជំនួយរបស់អឺរ៉ុប ដោយសារការគាំទ្រផ្នែកដែនអាកាសសម្រាប់អ៊ុយក្រែនមានកម្រិតរួចហើយ។

លោក Rutte បានអះអាងថា៖ «ឧស្សាហកម្មនឹងត្រូវបង្កើនការផលិតអាវុធបែបនេះ ដូចដែលយើងបានធ្វើក្នុងប៉ុន្មានឆ្នាំថ្មីៗនេះ ជាមួយនឹងគ្រាប់កាំភ្លើងធំ»។

លោកបន្តថា៖ «យើងត្រូវតែបង្កើតឡើងវិញនូវអ្វីដែលយើងកំពុងធ្វើជាមួយគ្រាប់រំសេវ ពេលនិយាយពីអាវុធសំខាន់ៗផ្សេងទៀត»។

ក្នុងរយៈពេលតិចជាងមួយសប្តាហ៍ បន្ទាប់ពីសហរដ្ឋអាមេរិក និងអ៊ីស្រាអែល បានបើកការវាយប្រហារលើអ៊ីរ៉ង់ ជម្លោះនេះឈានដល់ព្រំដែនអឺរ៉ុបដែលធ្ងន់ធ្ងរបំផុត។ ប្រទេសតួកគី ជាសមាជិកណាតូ បានលើកឡើងថា ប្រព័ន្ធការពារដែនអាកាសរបស់សម្ព័ន្ធមិត្តត្រូវដាក់ពង្រាយនៅថ្ងៃពុធ ដើម្បីបំផ្លាញមីស៊ីលផ្លោងរបស់អ៊ីរ៉ង់។

ដ្រូនផលិតដោយអ៊ីរ៉ង់កាលពីថ្ងៃចន្ទ បានកំណត់គោលដៅមូលដ្ឋានទ័ពអាកាសអង់គ្លេសលើកោះស៊ីប ដែលជាសមាជិកសហភាពអឺរ៉ុប ទោះបីជាមិនមែនជាសមាជិកណាតូក៏ដោយ។

លោក រូតតេ បានសន្ទនាជាមួយមេដឹកនាំមកពីអឺរ៉ុប និងកាណាដាក្នុងរយៈពេលប៉ុន្មានថ្ងៃថ្មីៗនេះ ដោយលោកលើកឡើងថា៖ «យើងកំពុងមានអារម្មណ៍ និងឮនូវបំណងប្រាថ្នាមួយធ្វើឱ្យប្រាកដថា ក្នុងនាមជាសម្ព័ន្ធមិត្ត យើងតាមដានអ្វីដែលអាមេរិកកំពុងធ្វើនៅមជ្ឈិមបូព៌ា ជាមួយអ៊ីរ៉ង់ […] ហើយក្នុងពេលជាមួយគ្នានេះ ធ្វើឱ្យប្រាកដថាអ៊ុយក្រែនមានអ្វីដែលគេត្រូវការដើម្បីរក្សាភាពរឹងមាំឥឡូវនេះក្នុងការប្រយុទ្ធ»។

លោកប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី (Volodymyr Zelenskyy) បានលើកឡើងលើបណ្តាញសង្គម X កាលពីថ្ងៃព្រហស្បតិ៍ថា អ៊ុយក្រែនបានទទួលសំណើជាក់លាក់មួយពីសហរដ្ឋអាមេរិកក្នុងការដោះស្រាយជាមួយដ្រូនរបស់អ៊ីរ៉ង់នៅមជ្ឈិមបូព៌ា។