អារ៉ាប៊ីសាអូឌីតបាញ់កម្ទេចដ្រូនអ៊ីរ៉ង់៣គ្រឿង ការពារទីក្រុងរីយ៉ាដពីការវាយប្រហារ

អារ៉ាប៊ីសាអូឌីតបានបាញ់កម្ទេចដ្រូនអ៊ីរ៉ង់ចំនួន៣គ្រឿងនៅភាគខាងកើតទីក្រុងរីយ៉ាដ កាលពីថ្ងៃសុក្រទី៦មីនា ក្នុងពេលដែលអ៊ីរ៉ង់បង្កើនការវាយប្រហារក្នុងតំបន់។

តាមការបញ្ជាក់ពីក្រសួងការពារជាតិអារ៉ាប៊ីសាអូឌីត ដ្រូនទាំង៣គ្រឿងត្រូវបានបាញ់កម្ទេចដោយប្រព័ន្ធការពារដែនអាកាស ដោយមិនបណ្តាលឲ្យមានការខូចខាតធ្ងន់ធ្ងរឬបាត់បង់ជីវិត។ ក្រៅពីនេះ អារ៉ាប៊ីសាអូឌីតក៏បានបាញ់ស្ទាក់មីស៊ីលបាលីស្ទីកចំនួន៣គ្រាប់ដែលតម្រង់ទៅកាន់មូលដ្ឋានទ័ពអាកាស Prince Sultan។

រដ្ឋាភិបាលរីយ៉ាដបានថ្កោលទោសទង្វើរបស់អ៊ីរ៉ង់ថាជា«សកម្មភាពដ៏កំសាក»និងរំលោភបំពានលើអធិបតេយ្យភាព ដោយសង្កត់ធ្ងន់ថានឹងធ្វើគ្រប់យ៉ាងការពារប្រជាជននិងហេដ្ឋារចនាសម្ព័ន្ធ។

អ៊ីរ៉ង់បានពង្រីកការវាយប្រហារទៅលើប្រទេសក្នុងតំបន់ឈូងសមុទ្រ រួមមានអារ៉ាប៊ីសាអូឌីត កាតា និងគុយវ៉ែត ដើម្បីសងសឹកនឹងការវាយប្រហាររបស់អាមេរិកនិងអ៊ីស្រាអែល។ មុននេះ អ៊ីរ៉ង់បានវាយប្រហាររោងចក្រប្រេង Aramco ដើម្បីរុញតម្លៃប្រេងពិភពលោកឡើង។

អារ៉ាប៊ីសាអូឌីតបានអំពាវនាវដល់សហគមន៍អន្តរជាតិឲ្យចាត់វិធានការប្រឆាំងអ៊ីរ៉ង់ ខណៈបន្តកិច្ចសហការយោធាយ៉ាងជិតស្និទ្ធជាមួយសហរដ្ឋអាមេរិក ដោយចែករំលែកទិន្នន័យរ៉ាដានិងប្រើប្រព័ន្ធការពារ Patriot និង THAAD។