ត្រាំគំរាមគុយបា ថាអាចជាគោលដៅបន្ទាប់បន្ទាប់ពីបញ្ចប់ប្រតិបត្តិការនៅអ៊ីរ៉ង់

សហរដ្ឋអាមេរិកបន្តគំរាមផ្តួលរំលំរដ្ឋាភិបាលគុយបា ដោយប្រធានាធិបតីដូណាល់ ត្រាំ បញ្ជាក់ថា សកម្មភាពយោធាអាចកើតឡើងនៅកោះកុម្មុយនីស្តនេះ បន្ទាប់ពីបញ្ចប់ប្រតិបត្តិការប្រឆាំងអ៊ីរ៉ង់។

ក្នុងសន្និសីទកាសែតនៅសេតវិមាន កាលពីថ្ងៃព្រហស្បតិ៍ លោកត្រាំបានថ្លែងក្នុងអំឡុងពេលទស្សនកិច្ចរបស់ក្រុមបាល់ទាត់ Inter Miami ដោយអរគុណដល់រដ្ឋមន្ត្រីការបរទេស Marco Rubio សម្រាប់ការងារលើប្រទេសគុយបា។

“អ្វីដែលកំពុងកើតឡើងលើប្រទេសគុយបា គឺអស្ចារ្យណាស់។ យើងចង់បញ្ចប់រឿងនេះ [អ៊ីរ៉ង់] ជាមុនសិន។ ប៉ុន្តែអ្វីដែលជាបញ្ហា វានៅត្រង់ពេលវេលាប៉ុណ្ណោះ” លោកត្រាំបានថ្លែង។

រដ្ឋាភិបាលត្រាំតែងតែគំរាមកំហែងទីក្រុងហាវ៉ាណា ដោយបង្កើនសម្ពាធសេដ្ឋកិច្ច ក្នុងគោលបំណងផ្តួលរំលំរដ្ឋាភិបាលកុម្មុយនីស្ត។

បន្ទាប់ពីសហរដ្ឋអាមេរិកចាប់ខ្លួនប្រធានាធិបតីវ៉េណេស៊ុយអេឡា នីកូឡាស ម៉ាឌូរ៉ូ កាលពីខែមករា លោកត្រាំបានគំរាមកាត់ផ្តាច់ការផ្គត់ផ្គង់ប្រេងទៅកាន់គុយបា ដែលជាខ្សែជីវិតសេដ្ឋកិច្ចសំខាន់សម្រាប់កោះនេះ។

“មើលទៅប្រទេសគុយបាត្រៀមខ្លួនរួចហើយ ក្នុងការដួលរលំនាពេលអនាគតដ៏ខ្លីខាងមុខនេះ” លោកត្រាំបាននិយាយកាលពីមុន។

រដ្ឋាភិបាលត្រាំបានបណ្តុះបណ្តាលកម្លាំងយោធាដ៏លើសលប់ ដើម្បីជំរុញអាទិភាពអាមេរិកនៅជុំវិញពិភពលោក រួមទាំងនៅអាមេរិកឡាទីន។

លោកត្រាំបានលើកឡើងពីជោគជ័យយោធារបស់សហរដ្ឋអាមេរិក៖ “យើងទទួលបានជោគជ័យយ៉ាងខ្លាំងតាមវិធីផ្សេងៗគ្នាជាច្រើន។ ខ្ញុំបានបង្កើតយោធា និងកសាងពួកគេឡើងវិញ។ យើងកំពុងប្រើប្រាស់ច្រើនជាងអ្វីដែលខ្ញុំចង់ប្រើប្រាស់!”

ព័ត៌មាននេះត្រូវបានចេញផ្សាយដោយ Al Jazeera នៅថ្ងៃទី០៥ ខែមីនា ឆ្នាំ២០២៦។