By ខេត្តបាត់ដំបង៖ ហេតុការណ៍គ្រោះថ្នាក់ចរាចរណ៍ដ៏ធ្ងន់ធ្ងរបានកើតឡើងនៅព្រឹកថ្ងៃទី៥ ខែមីនា ឆ្នាំ២០២៦ នៅពេលម៉ូតូចំនួន៣គ្រឿងបុកបន្តគ្នា បណ្តាលឱ្យមនុស្សប្រុសស្រីចំនួន៤នាក់រងរបួសធ្ងន់ស្រាល។
គ្រោះថ្នាក់នេះបានកើតឡើងនៅម៉ោង៧ព្រឹក នៅត្រង់ចំណុចផ្លូវប្រសព្វខាងមុខខ្លោងទ្វារវត្តតាមិម ស្ថិតក្នុងភូមិវត្តតាមិម ឃុំអូរដំបង១ ស្រុកសង្កែ ខេត្តបាត់ដំបង។ តាមការអះអាងពីប្រជាពលរដ្ឋក្នុងតំបន់ ហេតុការណ៍នេះបានកើតឡើងដោយសារតែការបើកបរមិនប្រុងប្រយ័ត្ន។
ប្រភពពីប្រជាពលរដ្ឋបានឱ្យដឹងថា ម៉ូតូដំបូងម៉ាកហុងដាឌ្រីមពណ៌ខ្មៅ ផ្លាកលេខបាត់ដំបង 1AJ-7493 បើកបរដោយបុរសម្នាក់ក្នុងទិសដៅពីលិចទៅកើត (ឆ្លងផ្លូវ) បានបុកទៅលើម៉ូតូមួយគ្រឿងទៀតដែលមានផ្លាកលេខបាត់ដំបង 1AR-2108 ដែលបើកបរដោយបុរសម្នាក់រួមជាមួយប្រពន្ធក្នុងទិសដៅពីជើងទៅត្បូង។
ក្រោយពីម៉ូតូទាំងពីរដួលរលំ ម៉ូតូទីបីម៉ាកហុងដាឌ្រីមពណ៌ខ្មៅ ផ្លាកលេខបាត់ដំបង 1AJ-7285 បើកបរដោយក្មេងស្រីសិស្សសាលាម្នាក់ក្នុងទិសដៅពីត្បូងទៅជើង បានជ្រុលទៅបុកនិងកិនពីលើម៉ូតូដែលដួលរលំ បណ្តាលឱ្យអ្នកដំណើរទាំង៤នាក់រងរបួសធ្ងន់ស្រាល។
ក្រោយពេលកើតហេតុ ជនរងគ្រោះទាំង៤នាក់ត្រូវបានសាច់ញាតិដឹកបញ្ជូនទៅសង្គ្រោះព្យាបាលនៅមន្ទីរពេទ្យ។ សមត្ថកិច្ចជំនាញបានចុះទៅវាស់វែងធ្វើកំណត់ហេតុ ហើយភាគីទាំងបីបានធ្វើការសម្របសម្រួលគ្នា។
តាមការសម្របសម្រួល ភាគីខាងម៉ូតូឆ្លងផ្លូវបានយកថ្លៃព្យាបាលឱ្យទៅភាគីពីរនាក់ប្តីប្រពន្ធចំនួន៣០០ដុល្លារ ចំណែកភាគីខាងក្មេងស្រីសិស្សសាលាបានសុំរួចខ្លួន។ ហេតុការណ៍នេះបង្ហាញពីគ្រោះថ្នាក់នៃការបើកបរមិនប្រុងប្រយ័ត្ននៅតាមផ្លូវប្រសព្វ។
