ភ្នំពេញចាប់ជនបរទេស៩៩នាក់ ពាក់ព័ន្ធបទល្មើសអនឡាញ ក្នុងប្រតិបត្តិការបង្ក្រាបពិសេស

ភ្នំពេញ៖ កម្លាំងសមត្ថកិច្ចរាជធានីភ្នំពេញ បានធ្វើប្រតិបត្តិការបង្ក្រាបពិសេស នៅថ្ងៃទី០៦ ខែមីនា ឆ្នាំ២០២៦ ដោយរកឃើញជនបរទេស៩៩នាក់ ស្នាក់នៅខុសច្បាប់ និងពាក់ព័ន្ធនឹងបទល្មើសអនឡាញ នៅទីតាំង២កន្លែងក្នុងរាជធានី។

ប្រតិបត្តិការនេះធ្វើឡើងតាមបទបញ្ជារបស់លោក ឃួង ស្រេង អភិបាលរាជធានីភ្នំពេញ និងលោកឧត្ដមសេនីយ៍ឯក ជួន ណារិន្ទ អគ្គស្នងការរង ដោយមានការសម្របសម្រួលពីតំណាងព្រះរាជអាជ្ញា និងកម្លាំងពីខណ្ឌជ្រោយចង្វារ និងខណ្ឌដូនពេញ។

នៅទីតាំងទី១ ក្នុងខុនដូ Yellow Tower ជាន់ទី៥ បន្ទប់C ផ្លូវទន្លេសាប សង្កាត់ជ្រោយចង្វារ រកឃើញបុគ្គលិក១៥នាក់ ដែលក្នុងនោះមានជនបរទេស៦នាក់ ជាជនជាតិឥណ្ឌូនេស៊ី។ ទីតាំងនេះជាភ្នាក់ងារបម្រើសេវាកម្មដាក់ប្រាក់ ដកប្រាក់ និងផ្ទៀងផ្ទាត់ព័ត៌មានជូនអតិថិជនលេងហ្គេមអនឡាញ។

សម្ភារៈរកឃើញមានទូរស័ព្ទដៃ១៦គ្រឿង ម៉ូនីទ័រ១២គ្រឿង និងCPU១៧គ្រឿង។ ទីតាំងនេះបម្រើសេវាកម្មទៅកាន់អតិថិជនភាគច្រើននៅប្រទេសឥណ្ឌូនេស៊ី។

ចំណែកទីតាំងទី២ នៅអគារស្នាក់នៅគ្មានឈ្មោះ កម្ពស់៨ជាន់ មាន៦៤បន្ទប់ រកឃើញជនបរទេស៩៣នាក់ ដែលក្នុងនោះ៩២នាក់ជាជនជាតិប៉ាគីស្ថាន និង១នាក់ជាជនជាតិឥណ្ឌា។

ក្នុងចំណោមជនបរទេសទាំងនោះ មាន៦២នាក់មានលិខិតឆ្លងដែនត្រឹមត្រូវ និង២៦នាក់មានលិខិតឆ្លងដែនផុតទិដ្ឋាការ និង៥នាក់គ្មានលិខិតឆ្លងដែន។

បច្ចុប្បន្ន សមត្ថកិច្ចបានបញ្ជូនខ្លួនជនបរទេសទាំងអស់ទៅកាន់ស្នងការដ្ឋាននគរបាលរាជធានីភ្នំពេញ ដើម្បីបន្តនីតិវិធីតាមច្បាប់។

ប្រតិបត្តិការនេះបង្ហាញពីការតស៊ូរបស់អាជ្ញាធរកម្ពុជា ក្នុងការបង្ក្រាបបទល្មើសអនឡាញ និងការត្រួតពិនិត្យអន្តោប្រវេសន៍យ៉ាងតឹងរ៉ឹង។