អឺរ៉ុបរិះគន់ហ្សេលេនស្គី បន្ទាប់ពីគំរាមកំហែងមេដឹកនាំហុងគ្រីក្នុងជម្លោះប្រាក់កម្ចី

គណៈកម្មការអឺរ៉ុបបានរិះគន់យ៉ាងខ្លាំងចំពោះប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី ដោយសារការគំរាមកំហែងដល់នាយករដ្ឋមន្ត្រីហុងគ្រី លោក Viktor Orban។ ជម្លោះនេះកើតឡើងពីប្រាក់កម្ចីរបស់សហភាពអឺរ៉ុបសម្រាប់អ៊ុយក្រែន ចំនួន ៩០ពាន់លានអឺរ៉ូ ដែលកំពុងត្រូវរារាំងដោយហុងគ្រី។

អ្នកនាំពាក្យគណៈកម្មការអឺរ៉ុប លោក Olof Gill បានថ្លែងថា៖ «ភាសាប្រភេទនេះមិនអាចទទួលយកបានទេ។ មិនត្រូវមានការគំរាមកំហែងប្រឆាំងនឹងរដ្ឋសមាជិកសហភាពអឺរ៉ុបណាមួយទេ។» លោកក៏បានអំពាវនាវឲ្យភាគីទាំងពីរ «បន្ថយ» ជម្លោះវោហាស័ព្ទដ៏មុតស្រួច។

លោកហ្សេលេនស្គីបានគំរាមកំហែងកាលពីថ្ងៃព្រហស្បតិ៍ថា បុគ្គលដែលរារាំងប្រាក់កម្ចីនេះត្រូវបញ្ឈប់ បើមិនដូច្នោះទេ លោកនឹងផ្តល់អាសយដ្ឋានរបស់គាត់ទៅយោធាអ៊ុយក្រែន។ ទោះបីជាលោកមិនបាននិយាយឈ្មោះចំៗក៏ដោយ ក៏សម្តីនេះហាក់ដូចជាកំណត់គោលដៅលើលោក Orban។

រដ្ឋាភិបាលហុងគ្រីបានចាត់ទុកសេចក្តីថ្លែងការណ៍ទាំងនេះថាជា «ការគំរាមកំហែងអាយុជីវិត» ចំពោះមេដឹកនាំរបស់ពួកគេ។

អត្ថបទ៖ សាង ស្រីល័ក្ខ