By ទីក្រុងតេហេរ៉ង់៖ ក្រសួងការបរទេសអ៊ីរ៉ង់បានអះអាងថា ការវាយប្រហាររបស់សហរដ្ឋអាមេរិក និងអ៊ីស្រាអែលបានកំណត់គោលដៅលើទីតាំងស៊ីវិលចំនួន ៣៣ កន្លែងទូទាំងប្រទេស រួមទាំងមន្ទីរពេទ្យ សាលារៀន តំបន់លំនៅដ្ឋាន និងអគារប្រវត្តិសាស្ត្រ Golestan Palace ដែលជាតំបន់បេតិកភណ្ឌពិភពលោក។
ផ្សែងខ្មៅក្រាស់បានហុយឡើងលើទីក្រុងតេហេរ៉ង់ បន្ទាប់ពីការវាយប្រហារតាមអាកាសដែលបានបំផ្លាញពហុកីឡដ្ឋានជាតិ Azadi ដែលជាកីឡាដ្ឋានធំបំផុតរបស់ប្រទេសអ៊ីរ៉ង់ តម្លៃជាង ៤០០ លានដុល្លារ សមត្ថភាពផ្ទុកអ្នកទស្សនាបានជាង ៧៨,០០០ នាក់។
តាមតួលេខរបស់រដ្ឋាភិបាលអ៊ីរ៉ង់ដែលបង្ហោះលើបណ្តាញទំនាក់ទំនងសង្គម X ទីតាំងស៊ីវិលជាង ៣,៦០០ កន្លែងបានរងការខូចខាតពីការវាយប្រហារ។ ប្រធានអឌ្ឍចន្ទក្រហមអ៊ីរ៉ង់បានបញ្ជាក់ថា យ៉ាងហោចណាស់ផ្ទះសម្បែងចំនួន ៣,០៩០ ខ្នង មជ្ឈមណ្ឌលពាណិជ្ជកម្មចំនួន ៥២៨ មណ្ឌលសុខភាពចំនួន ១៣ និងមជ្ឈមណ្ឌលអឌ្ឍចន្ទក្រហមចំនួន ៩ រងការវាយប្រហារ។
អ៊ីស្រាអែលបានបញ្ជាក់ពីការវាយប្រហារបន្ថែមលើទីក្រុងតេហេរ៉ង់ និងការផ្ទុះនៅតែបន្តនៅទូទាំងប្រទេសអ៊ីរ៉ង់។ ចំនួនអ្នកស្លាប់ក្នុងប្រទេសអ៊ីរ៉ង់ត្រូវបានរាយការណ៍ថា កើនឡើងដល់យ៉ាងហោចណាស់ ១,២៣០ នាក់ ចាប់តាំងពីថ្ងៃសៅរ៍សប្តាហ៍មុន។
អឌ្ឍចន្ទក្រហមអ៊ីរ៉ង់បានបញ្ជាក់ថា ឯកសារនៃការខូចខាតត្រូវបានដាក់ជូនគណៈកម្មាធិការអន្តរជាតិនៃកាកបាទក្រហម និងអង្គការអន្តរជាតិផ្សេងទៀត សម្រាប់ដំណើរការផ្លូវច្បាប់ដែលអាចកើតមាន។
