By វ៉ាស៊ីនតោន៖ លោកដូណាល់ត្រាំបានថ្លែងជាចំហថាបន្ទាប់ពីរួចដៃពីសង្គ្រាមនៅអ៊ីរ៉ង់ លោកនឹងងាកទៅចាត់ការប្រទេសគុយបាវិញម្ដង។ លោកទស្សន៍ទាយថារបបដឹកនាំកុម្មុយនិស្តនៅគុយបាមុខតែដួលរលំឆាប់ៗនេះជាមិនខាន។
ឥឡូវនេះ គុយបាកំពុងប្រឈមនឹងបញ្ហាលំបាកខ្លាំងដោយសារអាមេរិកបិទខ្ទប់មិនឱ្យប្រេងដឹកចូលគុយបាបានឡើយ។ លោកត្រាំអះអាងថាពួកគេ(គុយបា) ចង់ចរចាគ្នាឱ្យមានកិច្ចព្រមព្រៀង។
លោកថ្លែងនៅក្នុងបទសម្ភាសជាមួយទូរទស្សន៍ស៊ីអឹនអឹនថា៖ “យើងពិតជាកំពុងយកចិត្តទុកដាក់ចំពោះបញ្ហានេះ។ យើងនៅមានពេលខ្លះទៀតដែរ។ ៥០ឆ្នាំហើយគុយបាល្មមដល់ពេលដូរហើយ។”
លោកថារដ្ឋមន្ត្រីការបរទេសអាមេរិក លោករូប៊ីអូនឹងក្លាយជាមនុស្សដំបូងគេរបស់លោកដែលជាន់លើទឹកដីគុយបា។ លោកត្រាំ និងលោករូប៊ីអូបាននិយាយជាចំហថាត្រូវតែដូររបបដឹកនាំនៅគុយបា។
អ្នកសម្របសម្រួលរបស់ក្រសួងការបរទេសអាមេរិកទទួលបន្ទុកខាងកិច្ចការគុយបា លោករ៉ប់ អាលីសុន ទើបតែជួបជាមួយអ្នកតំណាងជាន់ខ្ពស់វិហារកាតូលិក។ នេះបើយោងតាមការបង្ហោះសារនៅលើបណ្ដាញអ៊ិចរបស់ស្ថានទូតអាមេរិកប្រចាំទីក្រុងឡាហាវ៉ាន់។
លោកត្រាំធ្លាប់និយាយញយដងថារបបដឹកនាំនៅគុយបារកកលនឹងដួលរលំដោយមិនចាំបាច់លោកប្រើកម្លាំងធ្វើអន្តរាគមន៍ទេ។ នៅក្នុងការប៉ុនប៉ងជាន់ពន្លិចឱ្យឆាប់ដួលរលំ លោកសម្រេចចិត្តបិទខ្ទប់មិនឱ្យមានប្រេងដឹកចូលគុយបាបានឡើយ។
ចាប់តាំងពីថ្ងៃទី៩ ខែមករា រហូតមកដល់ពេលនេះ គ្មានកប៉ាល់ណាមួយដឹកប្រេងចូលគុយបាទេ ជាហេតុធ្វើឱ្យក្រុមហ៊ុនអាកាសចរណ៍នានាលុបចោល ឬពន្យារពេលជើងហោះហើរទៅកាន់គុយបា។
រដ្ឋាភិបាលទីក្រុងឡាហាវ៉ានចោទប្រកាន់ថាលោកត្រាំចង់ខ្ទប់ដង្ហើមគុយបាឱ្យស្លាប់ទាំងជំហរតែម្ដង។ មែនទែនទៅ គុយបាប្រឈមនឹងបញ្ហាខ្វះថាមពល និងឥន្ធនៈមិនមែនទើបតែពេលនេះទេ។ ប្រទេសនេះជួបប្រទះនឹងបញ្ហានេះរាប់ឆ្នាំមកហើយ។
ប្រភព៖ ឆេនណល ញូស៍ អេស៊ា និងប្រភពដទៃទៀត
