រុស្ស៊ីផ្តល់ព័ត៌មានសម្ងាត់ដល់អ៊ីរ៉ង់ ដើម្បីវាយប្រហារកងទ័ពអាមេរិកនៅមជ្ឈិមបូព៌ា

រុស្ស៊ីត្រូវបានគេរាយការណ៍ថា បានផ្តល់ព័ត៌មានសម្ងាត់ជាបញ្ជីគោលដៅយោធាដល់អ៊ីរ៉ង់ ដើម្បីជួយកំណត់ទីតាំងនាវាចម្បាំង និងយន្តហោះចម្បាំងអាមេរិកនៅតំបន់មជ្ឈិមបូព៌ា។ ការលេចធ្លាយព័ត៌មាននេះត្រូវបានផ្សាយដោយទីភ្នាក់ងារព័ត៌មាន AP នៅថ្ងៃទី៦ មីនា ២០២៦ ដោយដកស្រង់ពីប្រភពមន្ត្រីអាមេរិក។

សេតវិមានបានបដិសេធពីផលប៉ះពាល់នៃការលេចធ្លាយនេះ ដោយអ្នកនាំពាក្យ Karoline Leavitt បានប្រកាសយ៉ាងដាច់ខាតថា៖ «យើងកំពុងកម្ទេចពួកគេទាំងស្រុងហើយ ហើយវាមិនអាចធ្វើឲ្យប៉ះពាល់ប្រតិបត្តិការយោធាអាមេរិកឡើយ»។

វិមានក្រឹមឡាំងបានរក្សាភាពស្ងប់ស្ងាត់ ដោយមិនព្រមបញ្ជាក់ពីការផ្តល់ជំនួយយោធាទៅអ៊ីរ៉ង់ ប៉ុន្តែបានអះអាងថាកិច្ចសន្ទនានឹងបន្ត។ ទំនាក់ទំនងនេះគឺជាការផ្តល់ផលប្រយោជន៍ទៅវិញទៅមក ដោយអ៊ីរ៉ង់ធ្លាប់ផ្តល់ដ្រូន Shahed និងមីស៊ីលដល់រុស្ស៊ីក្នុងសង្គ្រាមអ៊ុយក្រែន។

ឥឡូវនេះ ដ្រូនទាំងនោះត្រូវបានអ៊ីរ៉ង់ប្រើប្រាស់វាយបកលើអាមេរិកវិញ ដែលធ្វើឲ្យសហរដ្ឋអាមេរិក និងសម្ព័ន្ធមិត្តអារ៉ាប់ត្រូវងាកទៅរកអ្នកជំនាញអ៊ុយក្រែន ដើម្បីសុំយោបល់ពីរបៀបបាញ់ទម្លាក់ដ្រូនទាំងនោះ។