By ខេត្តស្ទឹងត្រែង៖ ខេត្តស្ទឹងត្រែងបានក្លាយជាខេត្តទីមួយនៅកម្ពុជាដែលចាប់ផ្ដើមប្រើប្រាស់ប្រេនឌីងទេសចរណ៍ថ្មីគឺ «ស្ទឹងត្រែងលើសពីទន្លេ លើសពីធម្មតា»។
លោក ហួត ហាក់ រដ្ឋមន្ត្រីក្រសួងទេសចរណ៍ បានអះអាងថា ការផ្ដួចផ្ដើមនេះបានធ្វើឡើងក្នុងព្រឹត្តិការណ៍ព្យុហយាត្រាទេសចរណ៍ដែលទាក់ទាញភ្ញៀវទេសចរជាតិ និងអន្តរជាតិយ៉ាងច្រើនកុះករ។
ពិធីនេះត្រូវបានរៀបចំឡើងដោយមានវត្តមានរបស់លោក ហួត ហាក់ រដ្ឋមន្ត្រីក្រសួងទេសចរណ៍ និងលោក សរ សុពុត្រា អភិបាលខេត្តស្ទឹងត្រែង ជាអធិបតីក្នុងពិធីបើកព្រឹត្តិការណ៍ព្យុហយាត្រាទេសចរណ៍ចម្ងាយ ៣,៥ គីឡូម៉ែត្រ។
ក្នុងឱកាសនេះ គេបានប្រកាសដាក់ឱ្យអនុវត្តជាផ្លូវការនូវ «ផែនការអភិវឌ្ឍន៍ទេសចរណ៍ខេត្តស្ទឹងត្រែងឆ្នាំ២០២៦-២០៣០» និងការដាក់ចេញប្រេនឌីងថ្មី «ស្ទឹងត្រែងលើសពីទន្លេ លើសពីធម្មតា»។
លោក ហួត ហាក់ បានចាត់ទុកថា ព្រឹត្តិការណ៍នេះស្តែងចេញពីការអនុវត្តទិសស្លោករបស់សម្តេច ហ៊ុន សែន គឺ «ទេសចរណ៍ដើម្បីទាំងអស់គ្នា ទាំងអស់គ្នាដើម្បីទេសចរណ៍»។
«ភាពជោគជ័យនៃវិស័យទេសចរណ៍ មិនមែនវាស់វែងត្រឹមតែចំនួនភ្ញៀវទេសចរប៉ុណ្ណោះទេ ប៉ុន្តែវាស់វែងតាមរយៈការបង្កើតចំណូលដល់មូលដ្ឋាន និងការធ្វើឱ្យសហគមន៍មានជីវភាពប្រសើរឡើង» លោករដ្ឋមន្ត្រីបានថ្លែង។
ព្រឹត្តិការណ៍នេះបានក្លាយជាវេទិកាសាមគ្គីភាពដែលតភ្ជាប់រវាងរដ្ឋបាលខេត្ត វិស័យឯកជន សហគមន៍ទេសចរណ៍ និងប្រជាពលរដ្ឋ ដែលជាយុទ្ធសាស្ត្រឈ្នះ-ឈ្នះ។
ស្មារតីនៃការរួបរួមគ្នានៅថ្ងៃនេះ នឹងធានាថាខេត្តស្ទឹងត្រែងនឹងបន្តរីកចម្រើនទៅមុខយ៉ាងឆាប់រហ័ស ក្នុងនាមជាគោលដៅទេសចរណ៍សំខាន់មួយរបស់កម្ពុជា។
ពិធីនេះក៏បានអបអរសាទរទិវាជាតិទីក្រុងស្អាតឆ្នាំ២០២៦ផងដែរ ក្រោមបរិយាកាសដ៏អធិកអធមក្រៃលែង។
ដោយ៖ តារា
